මහින්දට අයෙත් ඉල්ලන්න පුළුවන්? : අලුත් නීති තර්කයක්!

දෙවරක් ජනාධිපති තනතුර හෙබවූ අයකු තුන්වැනි වරටත් එම ධුරයට පත්වීම වළක්වාලීම සඳහා සම්මත කර ගන්නා ලද 19 වැනි ආණ්ඩුක්‍රම ව්‍යවස්ථා සංශෝධනය ම...

දෙවරක් ජනාධිපති තනතුර හෙබවූ අයකු තුන්වැනි වරටත් එම ධුරයට පත්වීම වළක්වාලීම සඳහා සම්මත කර ගන්නා ලද 19 වැනි ආණ්ඩුක්‍රම ව්‍යවස්ථා සංශෝධනය මගින් අදාළ අරමුණ අර්ථකථනය නොවන නිසා හිටපු ජනාධිපති මහින්ද රාජපක්‍ෂ මහතාට සහ හිටපු ජනාධිපතිනි චන්‍ද්‍රිකා කුමාරණතුංග මහත්මියට ඉදිරි ජනාධිපතිවරණයේදී තරග කළ හැකි බව නීති විශාරදයකු වන ආචාර්ය නිහාල් ජයවික්‍රම මහතා 'ඉරිදා දිවයින'ට පවසා ඇත.

1970 - 77 සමගි පෙරමුණ ආණ්ඩුව පැවැති කාලයේදී අධිකරණ අමාත්‍යාංශයේ ලේකම් ලෙස කටයුතු කළ ආචාර්ය නිහාල් ජයවික්‍රම පසුව බලයට පැමිණි ජේ. ආර්. ජයවර්ධන ආණ්ඩුව යටතේ ප්‍රජා අයිතිය අහෝසි කිරීමට ලක්විය.

ජයවික්‍රම මහතා අධිකරණ අමාත්‍යාංශ ලේකම්ව සිටි සමයේදී අධිකරණ ඇමැති ලෙස කටයුතු කළේ ෆීලික්ස් ඩයස් බණ්ඩාරනායක මහතා ය.

නිහාල් ජයවික්‍රම මහතා කියන පරිදි 1978 දී විධායක ජනාධිපති ධුරය හඳුන්වා දෙමින් සම්මත කර ගන්නා ලද ආණ්ඩුක්‍රම ව්‍යවස්ථාවේ 30 වන ෙඡ්දය මගින් පහත සඳහන් කරුණු තහවුරු කර ඇත.

එනම්;

30 (1) ශ්‍රී ලංකාවේ ජනාධිපති ධුරයක් පිහිටුවනු ලබන අතර එම ජනාධිපති රාජ්‍ය නායකයා ලෙසත් විධායකයේ සහ ආණ්ඩුවේ ප්‍රධානියා වන්නේය. ඔහු සන්නද්ධ හමුදාවල අණදෙන නිලධාරියා ද වන්නේය.

(2) ශ්‍රී ලංකා ජනරජයේ ජනාධිපති මහජනතාවගේ ඡන්දයෙන් තෝරාගනු ලැබේ. එම ධුර කාලය අවුරුදු 6 කි.

වසර 2015 දී ආණ්ඩුක්‍රම ව්‍යවස්ථාව සංශෝධනය කර ඇත්තේ 30 (1) ෙඡ්දයේ දෙවැනි වගන්තියේ සඳහන් ධුර කාලය වන වසර 6 වසර 5 බවට පත් කරමිනි.

මේ කරුණුවලට අමතරව වසර 2015 ජනාධිපතිවරණය පැවැත්වෙන අවස්ථාවේදී සිටි ජනාධිපතිවරයාට නැවත වරක් තරග කිරීමට නොහැක යන කාරණය පැහැදිලි ලෙස අර්ථකථනය වී නැති බව ජයවික්‍රම මහතා සඳහන් කරයි.

'මහින්දට පුළුවන් කතාව බොරුවක්' !

මේ අතර සති අන්ත 'අනිද්දා' පුවත්පත පවසන්නේ, මහින්ද රාජපක්ෂ මහතාට 19 වැනි සංශෝධනය අනුව නැවත වරක් ජනාධිපතිවරණයට ඉදිරිපත් විය හැකි බව මතයක් නිර්මාණය කිරීම ටික දිනකට මාධ්‍ය නොමග යැවීම වෙනුවෙන් නිර්මාණය කළ මතයක් බවයි.

'අනිද්දා' සමග අදහස් දැක්වූ ඒකාබද්ධ විපක්ෂයේ නායකයෙක් එබව සඳහන් කර තිබේ.

ඒ සම්බන්ධයෙන් එම පුවත් වාර්තාවේ මෙසේද සඳහන් වේ.

ජී.එල්. පීරිස් දිස්ත්‍රික් අධිකරණයට :

''මහාචාර්ය ජී.එල්.පීරිස් මහතා ඒ පිළිබඳව පොදුජන පෙරමුණේ මාධ්‍ය සාකච්ඡාවකදී ප්‍රකාශ කළත්, ඒකාබද්ධ විපක්ෂය ඒ සම්බන්ධයෙන් තවමත් කිසිදු එකඟතාවයකට පැමිණ නැති බව එම පක්ෂ නායකයා පැවසිය.

මෙම මාතෘකාව ටික දිනකට මාධ්‍යයට හපන්නට හොඳ යමක් ලෙස එම පක්ෂ නායකයා හඳුන්වා දුන්නේය.

මහින්ද රාජපක්ෂ මහතාට ජනාධිපතිවරණයට ඉදිරිපත් වීම සඳහා නීතිමය පසුබිමක් නොවන බව තමා ඇතුළු ඒකාබද්ධ විපක්ෂ කණ්ඩායමේ වැඩි දෙනෙකු හොඳින් දන්නා බවද එම පක්ෂ නායකයා සඳහන් කළේය.

තමන් ඒ පිළිබඳව ජී.එල්.පීරිස් මහාචාර්යවරයා සමඟ සාකච්ඡා නොකළත්, මෙය පදනම් විරහිත නීති තර්කයක් බව පීරිස් මහාචාර්යවරයා නොදැන සිටීමට හේතුවක් නැති බව එම පක්ෂ නායකයා කීය.

කෙසේ වෙතත් ශ්‍රී ලංකා පොදුජන පෙරමුණේ සභාපති, මහාචාර්ය ජී.එල්. පීරිස් මහතා මේ සම්බන්ධයෙන් දිස්ත්‍රික් අධිකරණයට ඉදිරිපත් වෙන බව ප්‍රකාශ කර ඇත.

ඒ පිළිබඳ විමසීම සඳහා මහාචාර්ය පීරිස් මහතාව දුරකථනයෙන් සම්බන්ධ කර ගැනීමට උත්සාහ කළත්, ඔහු දින කිහිපයකට විදේශගත වී ඇතැයි ඔහුට සම්බන්ධ ආරංචි මාර්ග පැවසීය.''