නීතීවිරෝධි ලෙස ඉදිරිකර ඇති ගාල්ල ජාත්‍යන්තර ක්‍රීඩාංගනයේ ගොඩනැගිලි කඩා ඉවත්කොට එම භූමිය අනිවාර්යයෙන්ම යළි ජනතා අයිතියට පත්කරන බව ස්වදේශ කට...
නීතීවිරෝධි ලෙස ඉදිරිකර ඇති ගාල්ල ජාත්‍යන්තර ක්‍රීඩාංගනයේ ගොඩනැගිලි කඩා ඉවත්කොට එම භූමිය අනිවාර්යයෙන්ම යළි ජනතා අයිතියට පත්කරන බව ස්වදේශ කටයුතු අමාත්‍ය වජිර අබේවර්ධන මහතා පවසයි.
ගාල්ලේ පැවති උත්සවයකදී අමාත්‍යවරයා වැඩිදුරටත් පැවසුවේ ජාත්‍යන්තර ක්‍රීඩාංගනයක් අවැසිනම් වෙනත් සුදුසු ස්ථානයක එය ඉදිකරගැනීමට හැකියාව ඇති බවයි.
බ්‍රිතාන්‍ය පාලන සමයේ 1876 වසරේදී ගාල්ල ක්‍රීඩාංගනය ඉදිවන්නේ තුරඟ තරඟ පිටියක් ලෙස වන අතර 1927 වසරේදී එය ක්‍රිකට් ක්‍රීඩාංගනයක් ලෙස ප්‍රකාශයට පත් කරනු ලැබීය.
මෙහි මංගල අන්තර් ජාතික ක්‍රිකට් තරඟය වන්නේ 1998 වසරේදී ශ්‍රී ලංකාව සහ නවසීලන්තය අතර පැවති ටෙස්ට් තරගයයයි.
2004 වසරේ බලපෑ සුනාමි ව්‍යසනයෙන් ගාල්ල ක්‍රීඩාංගනය මුළුමනින්ම විනාශ වූ අතර ප්‍රතිසංස්කරණ කටයුතු වලින් පසු ක්‍රීඩාංගනය ජාත්‍යන්තර තරඟ සඳහා යලි විවෘත වන්නේ 2007 දෙසැම්බර් 17 වනදා එංගලන්තය සහ ශ්‍රී ලංකාව අතර පැවති ටෙස්ට් තරඟය සඳහායි.
ගාල්ල ජාත්‍යන්තර ක්‍රීඩාංගණයේ මෙතෙක් පැවති ටෙස්ට් තරග 31 න් ශ්‍රී ලංකාව තරග 18ක් ජය ගෙන ඇති අතර එය නම්දරා ඇත්තේ ශ්‍රී ලංකා ක්‍රිකට් කණ්ඩායමට වාසනාව උදා කරන ක්‍රීඩාංගනණයක් ලෙසයි.
ඓතිහාසික ගාලු කොටුවට යාබදව පිහිටා ඇති ගාල්ල අන්තර්ජාතික ක්‍රිකට් ක්‍රීඩාංගනය ලොව ටෙස්ට් ක්‍රිකට් ක්‍රීඩාංගන අතර වඩාත් නෙත් ඇදගන්නා සුළු ක්‍රීඩාංගනයක් ලෙස ප්‍රචලිතයි.
නමුත් ගාල්ල ජාත්‍යන්තර ක්‍රිකට් ක්‍රීඩාංගණයේ ඉදිකර ඇති ප්‍රධාන ක්‍රීඩාගාරය ඇතුළු ගොඩනැගිලි හේතුවෙන් ලෝක උරුමයක් ලෙස සැලකෙන ගාලු පවුර සංරක්ෂණයට බාධා එල්ල වී ඇති බවත් මෙම තත්වය තුළ ගාලු කොටු පවුර ලෝක උරුම ලැයිස්තුවෙන් ඉවත් වීමේ අවදානමක් පවතින බවත් යුනෙස්කෝ සංවිධානය පසුගියදා ශ්‍රී ලංකා රජයට දැනුම් දී ඇති බවයි වාර්තා වේ.
කෙසේ වෙතත් ගාලු ජාත්‍යන්තර ක්‍රීඩාංගනයේ මෙම නව ගොඩනැගිලි ඉදිකෙරුණු 2007 වසරේදී ගාලු උරුමය සංවිධානයේ සභාපතිවරයා උද්ගතව ඇති තත්වය සම්බන්ධයෙන් පළකලේ මෙවන් අදහසක්.
ප්‍රේක්ෂකාගාරය, ක්‍රීඩාගාරය හා ගාලු ක්‍රිකට් සමාජයේ ක්‍රීඩාගාරය පිළිබඳ යුනෙස්කෝ සංවිධානයෙන් විවිධ අවස්ථාවලදි ගැටළු පැමිණි බවත් ඒ අනුව ඒ සඳහා සොයා බැලීමට පැමිණි නියෝජිතවරියට දැනට ඉදිකර ඇති ගොඩනැගිලි හැරුණු විට තවත් කිසිඳු ගොඩනැගිල්ලක් ඉදි නොකරන බවට ක්‍රිකට් ආයතනයේ නියෝජිතවරයා පැවසූ බවත් ඒ අනුව ඒ පිළිබඳව යුනෙස්කෝ නියෝජිතවරිය සෑහීමකට පත් වූ බව ඒ මහතා වැඩිදුරටත් ප්‍රකාශ කළේය.
කෙසේ වෙතත් ගාල්ලේ පැවති උත්සවයකදී අමාත්‍ය වජිර අබේවර්ධන මහතා ගාල්ල ජාත්‍යන්තර ක්‍රීඩාංගනය සම්බන්ධයෙන් තමන් දරන ස්ථාවරය මෙලෙස පැහැදිළි කළේය.
එහිදී අමාත්‍යවරයා පැවසූවේ ක්‍රීඩාංගනය සඳහා කිසිඳු අනුමැතියක් ලබාගෙන නොමැති බවත් ක්‍රිකට් ක්‍රීඩා කිරීම සඳහා අධිවේගී මාර්ගය ආසන්නයේ ක්‍රීඩා පිටියක් සදා දෙන බවත් "එය හැදුවත් එකයි නැතත් එකයි" යනුවෙන් අමාත්‍යවරයා පැවසීය.
මේ අතර ශ්‍රි ලංකා කණ්ඩායමේ දඟ පන්දු යවන ක්‍රීඩක රංගන හේරත් ද මෙම තත්වය සම්බන්ධයෙන් අදහස් පළකරමින් සඳහන් කළේ එවැනි අවස්ථාවක් උදාවුවහොත් තමා පෞද්ගලිකව කණගාටුවන බවයි.
COMMENTS