රටේ පාලනය යළි මහින්ද අතට ගැනීමේ සැලසුමක්?

ඉතා කෙටි කාලයක්‌ තුළ බිහිකළ ශ්‍රී ලංකා පොදුජන පෙරමුණ අද වන විට රටේ ප්‍රබලතම දේශපාලන පක්‍ෂය බවට පත්ව ඇති බවත් ශ්‍රී ලංකා පොදුජන පෙරමුණේ සාම...

ඉතා කෙටි කාලයක්‌ තුළ බිහිකළ ශ්‍රී ලංකා පොදුජන පෙරමුණ අද වන විට රටේ ප්‍රබලතම දේශපාලන පක්‍ෂය බවට පත්ව ඇති බවත් ශ්‍රී ලංකා පොදුජන පෙරමුණේ සාමාජිකයින් බේද කරවීමට ඇතැමුන් ගෙන යන ක්‍රියාවලියට මුහුණ දීමට තමා සුදානම් බවත් හිටපු අමාත්‍ය බැසිල් රාජපක්‍ෂ මහතා පවසයි.

සිංහල හින්දු අළුත් අවුරුද්දෙන් අනතුරුව බත්තරමුල්ල නෙළුම් මාවතේ පිහිටි ශ්‍රී ලංකා පොදුජන පෙරමුණ පක්‍ෂ කාර්යාලයේදී ඊයේ (19) වැඩ ආරම්භ කිරීමේ අවස්‌ථාවට එක්‌වෙමින් ඔහු මේ බව පැවැසීය.

ශ්‍රී ලංකා පොදුජන පෙරමුණ මෙරට ප්‍රබල දේශපාලන පක්‍ෂය බව පැවැති පළාත් පාලන මැතිවරණයෙන් පැහැදිලි වූ බවත් හෙතෙම සඳහන් කළේය.

එහිදී වැඩිදුරටත් අදහස්‌ දැක්‌වූ බැසිල් රාජපක්‍ෂ මහතා,

“ශ්‍රී ලංකා පොදුජන පෙරමුණ ආරම්භ කර වසර 1 1/2 ක වැනි කාලයකදී පළාත් පාලන මැතිවරණයකදී ආයතන 200 කට වැඩි ප්‍රමාණයක්‌ ජයග්‍රහණය කරමින් මහජන නියෝජිතයන් වැඩිම පිරිසක්‌ සිටින පක්‍ෂය බවට පත්වෙලා. මහජන නියෝජිතයන් වැඩිවීමත් සමග දැන් වගකීම්ද වැඩිවී තිබෙනවා.
අපි ජයග්‍රහණයෙන් ආඩම්බර නොවී මහජනතාවට පක්‍ෂපාතීව කටයුතු කිරීමට බැඳී සිටිනවා. අපේ ශක්‌තියේ ප්‍රධාන කරුණු දෙක වූයේ හිටපු ජනාධිපති මහින්ද රාජපක්‍ෂ මහතා හා සාමාජිකත්වයයි.
පසුගිය නොවැම්බර් මාසයේ පැවැති පළාත් පාලන මැතිවරණයේ කටයුතු පෙරේදා (18) පුදුකුඩුඉරුප්පු නිලවරණයෙන් අවසන් වූවා. එම කටයුතු අවසන් වීමෙන් පසු ඊළඟ ඡන්දයට සූදානම් වෙනවා. ඉදිරි මැතිවරණ කටයුතුත් මහින්ද රාජපක්‍ෂ හිටපු ජනාධිපතිතුමාගේ නායකත්වයෙන් මෙහෙයවනවා.

අපි බේද කිරීමට, වෙන් කිරීමට කවුරුන් කටයුතු කළත් අපි ඒවාට යටත් නොවී ජනතාව වෙනුවෙන් නිහතමානීව සේවය කරනවා. දිවයිනේ පළාත් පාලන ආයතන තුන්සිය ගණනින් දෙසීයකට වැඩි ප්‍රමාණයක බලය ශ්‍රී ලංකා පොදුජන පෙරමුණට හිමිවී තිබෙනවා. දැන් අපට විශාල වගකීමක්‌ පැවරී තිබෙනවා. “

ශ්‍රී ලංකා නිදහස්‌ පක්‍ෂයේ මන්ත්‍රීවරු 16 ක්‌ විපක්‍ෂයට එක්‌වීමට සූදානමක්‌ තිබෙන බවත් ශ්‍රී ලංකා නිදහස්‌ පක්‍ෂයේ 13 ලක්‍ෂයක්‌ පමණ වූ ඡන්ද දායකයන්ගෙන් දසලක්‍ෂයක්‌ පමණ පසුගිය පෙබරවාරි 11 වැනිදා ශ්‍රී ලංකා පොදුජන පෙරමුණ සමග එක්‌වූ බවත් හෙතෙම පෙන්වා දුන්නේය.

ශ්‍රී ලංකා නිදහස්‌ පක්‍ෂය හා ශ්‍රී ලංකා පොදුජන පෙරමුණ කියන්නේ දෙකක්‌ බවත් ප්‍රශ්න අවසන් නිසා දැන් අපට ඇත්තේ ඊළඟ මැතිවරණයත් දිනා ගැනීම යැයිද බැසිල් රාජපක්ෂ මහතා සඳහන් කළේය.
රටේ පාලනය අනිවාර්යයෙන්ම මහින්ද රාජපක්ෂ මහතා විසින් ලබා ගැනීම සිය එකම පරමාර්තය වන බව ද ඔහු වැඩිදුරටත් පැවසී ය.