ජාතික සමඟිය සහ සංහිඳියාව තහවුරු කරමින් ඒකීය රටක් ගොඩනැගීමට ගෙනයන වැඩපිළිවෙළේදී රටේ ඒකීයභාවය සුරකිනවා මිස කිසිදු අවස්ථාවක රට කැඩීමට ඉඩ නොතබ...
ජාතික සමඟිය සහ සංහිඳියාව තහවුරු කරමින් ඒකීය රටක් ගොඩනැගීමට ගෙනයන වැඩපිළිවෙළේදී රටේ ඒකීයභාවය සුරකිනවා මිස කිසිදු අවස්ථාවක රට කැඩීමට ඉඩ නොතබන බව ජනාධිපති මෛතී‍්‍රපාල සිරිසේන මහතා අවධාරණය කරයි.
රට කඩන සහ රට බෙදන බවට දේශපාලන වේදිකාවේ ගෙනයන සටන් පාඨවල කිසිදු සත්‍යතාවයක් නොමැති අතර ජනතාව එම බොරු ප‍්‍රචාරවලට හසු නොවිය යුතු බව ද ජනාධිපතිවරයා සඳහන් කළේය.
ජනාධිපතිවරයා මේ බව ප්රකාශ කළේ පෙරේදා (06) පස්වරුවේ මාතර හක්මණ ප‍්‍රදේශයේ පැවති ජනහමුවක් අමතමිනි.
උතුරේ ෆෙඩරල් ක‍්‍රමයක් පිළිබඳ හඬක් නැඟුණේ අද ඊයේ නොවන අතර එය දීර්ඝ කාලයක් පුරා නැගුණු හඬක් බව මෙහිදී සඳහන් කළ ජනාධිපතිවරයා කිසිදු රජයකින් ඊට ඉඩක් නොලැබුණා සේම රට කැඩීමට හා බෙදීමට කිසිවෙකුට අවශ්‍ය වුව ද තමාගෙන් ද කිසිසේත් ඊට ඉඩක් නොලැබෙන බව අවධාරණය කළේය.
සැමදා මේ රට ආරක්ෂා කළේ ශ‍්‍රී ලංකා නිදහස් පක්ෂය බව පැවසූ ජනාධිපතිවරයා හෙට දවසේ ද අන් සියලු දේශපාලන පක්ෂවලට වඩා රට ආරක්ෂා කරන දේශපේ‍්‍රමි ජනතා ව්‍යාපාරය ශී‍්‍ර ලංකා නිදහස් පක්ෂය බව ද පැවසීය.
ජනාධිපති කාර්යාලයේ සේවකයින් 400 දෙනෙකුට තමන් රැකියා අහිමිකළ බවට හිටපු නායකයා ඊයේ දින රූපවාහිනි වැඩසටහනකට කළ ප‍්‍රකාශය ද සිහිපත් කළ ජනාධිපතිවරයා කියා සිටියේ තමන් ජනාධිපති ධුරයට පැමිණෙන විට ජනාධිපති කාර්යාලයේ වැටුප් ලබා ගන්නා සේවකයින් 1600 දෙනෙකු සිටී අතර ඔවුන්ගෙන් 400 දෙනෙකු ජනාධිපති කාර්යාලයෙන් පිටත සිට වැටුප් ලබා ගත් බවයි.
එම සේවකයින් සුදුසු ස්ථාන වෙත අනුයුක්තකර ඔවුන්ගේ වෘත්තිය ආරක්ෂා කිරීමට පියවර ගත්තා මිස කිසිවෙකු රැකියාවෙන් ඉවත් නොකළ බව ජනාධිපතිවරයා පැවසීය.
එක්සත් ජාතික පක්ෂයට අයත් අමාත්‍යාංශවල සිටි ශ‍්‍රී ලංකා නිදහස් පක්ෂයේ වෘත්තීය සමිති සාමාජිකයින් රැකියාවලින් ඉවත්කළ විට ඊට ද මැදිහත් වූ තමා එම සේවකයින් සියලුදෙනා ආපසු බඳවා ගත්තා පමණක් නොව කොන්ත‍්‍රාත් පදනම මත සිටී සේවකයින් ස්ථීර කිරීමට ද පියවර ගත් බව ජනාධිපතිවරයා සිහිපත් කළේය.
එමෙන්ම විදුලි පුටුව පිළිබඳ තර්ජනය තවම අවසන් වී නොමැති බවට හිටපු නායකයා එම රූපවාහිනී වැඩසටහනේදී කළ ප‍්‍රකාශය ද සිහිපත් කළ ජනාධිපතිවරයා කියා සිටියේ කිසිවෙකු විදුලි පුටුවට ගෙනයාමට තමා ඉඩ නොතබන අතර ජාත්‍යන්තරයේ සියලු දෙනාගේ සහය ලබා ගනිමින් එම පරිච්ඡේදය අවසන් කර දැමූ බවයි.
රටේ ප‍්‍රගතිශීලි ජනතා ව්‍යාපාරය බිඳ දමමින් එහි වාසිය දූෂිත දේශපාලනඥයින්ට ලබාදීමට අලුත් පක්ෂ පිහිටුවාගෙන සිදුකරන දේශපාලන කුමන්ත‍්‍රණවලට හසු නොවී පිරිසිදු දේශපාලන ව්‍යාපාරයක් වෙනුවෙන් පෙළගැසෙන්නැයි ද මෙහිදී ජනාධිපතිවරයා සමස්ත ජනතාවට ආරාධනා කළේය.
ශී‍්‍ර ලංකා නිදහස් පක්ෂයේ සභාපතිත්වය තමා විධායක බලතල යොදවා ලබාගත් බවට හිටපු ජනාධිපතිවරයා රූපවාහිනී නාලිකාවකට කළ ප‍්‍රකාශය ද සිහිපත් කළ ජනාධිපතිවරයා කියා සිටියේ හිටපු කථානායකවරයාගේ නිවසට ඒමට තමාට ආරාධනා කර ශ‍්‍රී ලංකා නිදහස් පක්ෂයේ මන්තී‍්‍රවරුන් පිරිසක් ද ඉදිරිපිට එකම මේසයක වාඩිවී සාකච්ඡා කිරීමෙන් අනතුරුව එම සභාපතිත්වය තමා වෙත භාරදුන්නේ හිටපු ජනාධිපතිවරයා විසින්ම බවයි. එබැවින් එවැනි ප්රකාශ පිළිබඳ තමා කනගාටු වන බව ද ජනාධිපතිවරයා පැවසීය.
COMMENTS