අපේ මචං; අපිත් එක්ක එකට හොර පොලෙන් අඩි ගැසු, දැවැන්ත නාසය අදිමින් කැස්ස හැදෙන තුරු හිනා වුනු, නිරන්තරයෙන් පෙමින් වෙලෙමින් විරහ වේදනාවෙන්...
අපේ මචං; අපිත් එක්ක එකට හොර පොලෙන් අඩි ගැසු, දැවැන්ත නාසය අදිමින් කැස්ස හැදෙන තුරු හිනා වුනු, නිරන්තරයෙන් පෙමින් වෙලෙමින් විරහ වේදනාවෙන් හඬන, යතුරු පැදියෙන් ගමන් ගොස් C-90 ය ගිය තැන දමා අමතක වී ටැක්සියෙන් ගෙදෙර එන, අප ලවා ගෙන්නා ගත් අරක්කු අපට නොදී තනියම බොන ..... වසන්ත!
අසූ ගණන් වල මුල් භාගයේ දෙවසරකට වැඩි කාලයක් දිනපතා පාහේ බමබලපිටියේ ලෝරිස් පාරේ පිහිටි ඔහුගේ නිවසේ දී වසන්ත ඔබේසේකර හඳුනා ගැනීමට මෙන්ම ඔහු ඇසුරේ සිනමා කලාව හදාරන්නට ලැබුණු අවස්ථාව මා ලත් දුර්ලභ භාග්‍යයකි.
අප වැනි තරුණ අඳ බාලයන් සෙවනට ගෙන නොදත් දේ කියා දීමත් නව අදහස් වගා කර ගැනීමට දිරි දීමත් වසන්ත සර් ගේ උතුම් ගුණයකි. සිනමාව ශ්‍රව්‍ය දෘශ්‍ය මාධ්‍යයක් බව නිරන්තරයෙන් මෙනෙහි කළ ඔහු, රුපය සහ හඬ පටය සමාන්තර චේදනය තුලින් තුන්වැනි තලයක් බිහි කිරීම පිළිබඳ අත්හදා බැලීම් සිදු කරමින් සිනමාවේ නව මානයන් සොයා යමින් සිටියදී නව පරපුර දිරිමත් කිරීම ඔහු තදින් විශ්වාශ කළ දෙයකි.
නිර්මාණ කාර්යයේදී ඔහු තුල වූ කැප වීම සහ වසන්ත ට ආවේනික ‘අවුල් විනය’ තුලින් නිර්මාණයට හවුල්වූ සියල්ලන් ආකර්ෂණයකින් වසඟයට ලක් කර ගැනීමට ඔහු සමත් වීය. රුප ගතකරද්දී හිස කෙස් අදිමින් උච්ච ආවේගයට පත්වන අවස්ථා වලදී ත් සොඳුරු සරින් සහෝදර කලාකරුවනට උපදෙස් දෙන විටදීත් ඔහු නිර්මාණයේ දැහැන බිඳ නොගනී.
කිව යුතු දේ කෙලින් කී වසන්ත, නිරන්තර ආවේගයට පත්වූ සියුම් මිනිසෙකි. කලක් සහාය අධ්‍යක්‍ෂ ලෙස කටයුතු කළ ක්‍රිස්ටි ෂෙල්ටන් ප්‍රනාන්දු, සම්මානනීය සිනමාකරු ප්‍රසන්න විතානගේ ඇතුළු පිරිස් වසන්ත ඔබේසේකරට සදා ණය ගැති ය. තිර රචනා වේදී ත් චිත්‍රපට නිර්මානයේදී ත් කළ යුතු දේ මෙන්ම නොකළ යුතු දේ වසන්ත සර් ගේ ආදර්ශයෙන් දැක බලා ගන්නට අපට හැකි විය.
ජීවිතය එල්ල කළ අභියෝගයන් හමුවේ දිගින් දිගට නිර්මාණ කාර්යයේ යෙදුනු වසන්ත ‘සර්’ සිහින දැකීම අත් නොහල සැබෑ කලාකරුවෙකි.
වල්මත්වූවෝ රංගනයේ දී වරක් ඔහු හා ගැටුණු ශ්‍රේෂ්ඨ රංගන ශිල්පී ටෝනි රණසිංහ මා හා පැවසුවේ, “සිංහල සිනමාවේ භරත මුණි, වසන්ත ඔබේසේකර ඒ වුනාට හරියට ට්වෙන්ටි ලෙන්ස් එක අඳුරන්නේ නැ” යනුවෙනි.
ඇසු පිරු තැන් ඇති බුද්ධි මතෙකු වූ ටෝනි අපහාසයටත් අපේ සර් හැඳින්වුයේ සිංහල සිනමාවේ භරතමුණි ලෙසින් වීම වැදගත් යන්න මගේ හැගීමයි. ජීවිතය පිළිබඳව මෙන්ම, දේශපාලනය, සිනමාව, ගෘහ ජීවිතය, ආදරය පිළිබඳ ආවේනික අවුල් විනයකින් කටයුතු කරමින් දිවි ගතකල වසන්ත ඔබේසේකර දුර්ලභ වර්ගයේ බුද්ධිමතෙකි.
භීෂණ සමයේ තම ජීවිතයට එල්ලවිය හැකි තර්ජන නොතකා නිවසේ රැකවරණ ලබා දී සිටි තරුණ පිරිස හද සැත්කමට සර් පිටරට ගිය අතරේ ගෙදර තිබූ දුර්ලභ පොත පත ඇතුළු වටිනා සියල්ල විකුණා පලා ගිය මොහොතේ සර් කඳුළු සලමින් පාපතර ද්‍රෝහීන් සිදු කළ ඒ සිද්ධිය විස්තර කළ අන්දම අමතක නොවන්නකි.
දින කිහිපයකට පෙර සර් බලන්නට ගිය ප්‍රසන්න විතානගේ සමග පෙළෙමින් ඇති වේදනාව ගැන කියමින්
“මරණං නියතං ..... මට දැන් යන්න දීපල්ලා!” යැයි පැවසූ ‘සර්’ අද නික්ම ගියේය.
සර් යන ගමන් අපේ මචං ද රැගෙන ගියේය.
ප්‍රියත් ලියනගේ
COMMENTS