කොළඹ 5 ප්‍රදේශයේ පිහිටි හෙන්රි ප්‍රේද්‍රිස් ක්‍රීඩාංගනය, ඉසිපතන විද්‍යාලයට ලබාදීමට පළාත් සභා සහ පළාත් පාලන අමාත්‍ය ෆයිසර් මුස්තෆා මහතා, කො...
කොළඹ 5 ප්‍රදේශයේ පිහිටි හෙන්රි ප්‍රේද්‍රිස් ක්‍රීඩාංගනය, ඉසිපතන විද්‍යාලයට ලබාදීමට පළාත් සභා සහ පළාත් පාලන අමාත්‍ය ෆයිසර් මුස්තෆා මහතා, කොළඹ මහ නගර සභාවේ නිලධාරීන්ට උපදෙස් දී තිබේ.
පෙරේදා (05) කොළඹ 5, ඉසිපතන විද්‍යාලයේ අමාත්‍ය ෆයිසර් මුස්තෆා මහතාගේ ප්‍රධානත්වයෙන් පැවති සාකච්ඡාවකදී මෙලෙස උපදෙස් දී ඇත.
මෙම සාකච්ඡාවට, ඉසිපතන විද්‍යාලයේ විදුහල්පති ප්‍රේමසිරි ඈපා මහතා ඇතුළු ගුරුවරුන්, කොළඹ නාගරික කොමසාරිස් වී. කේ. අනුර මහතා ඇතුළු නගර සභා නිලධාරීන් සහ පළාත් සභා සහ පළාත් පාලන අමාත්‍යංශයේ නිලධාරීන් පිරිසක් එක්ව සිටියහ.
ඉසිපතන විද්‍යාලයේ විදුහල්පති ඇතුළු ආදී ශිෂ්‍ය සංගමය අග්‍රාමාත්‍යවරයාගෙන් කළ ඉල්ලීමකට ප්‍රතිචාරයක් වශයෙන් අග්‍රාමාත්‍ය රනිල් වික්‍රමසිංහ මහතාගේ උපදෙස් මත හෙන්රි ප්‍රේද්‍රිස් ක්‍රීඩාංගනය ඉසිපතන විද්‍යාලයට ලබාදීමට කටයුතු කළ බව අමාත්‍යවරයා සඳහන් කළේය.
ඉසිපතන විද්‍යාලයේ විදුහල්පති ප්‍රේමසිරි ඈපා මතා පැවසුවේ, වසර 62 ක් වනඉසිපතන විද්‍යාලයට ක්‍රීඩාංගනයක් ලැබීම ඓතිහාසික අවස්ථාවක් බවයි.
මේ අනුව, මෙතෙක් කොළඹ මහ නගර සභාව යටතේ පැවති හෙන්රි ප්‍රේද්‍රිස් ක්‍රීඩාංගනයේ පරිපාලනය, නඩත්තුව සහ සංවර්ධන කටයුතු, ඉදිරියේදි මහ නගර සභාව සහ ඉසිපතන විද්‍යාලය අතර ඇතිකරගන්නා අවබෝධතා ගිවිසුමක් මඟින්, දෙපාර්ශවය විසින් ක්රියාත්මක කරනු ඇත.
කොළඹ මහ නගර සභාවේ නාගරික භාණ්ඩාගාරික කේ. ඩී. චිත්‍රපාල මහතා පැවසුවේ, අවබෝධතා ගිවිසුම සකස් කිරීම සඳහා, අගමැති කාර්යාලය, පළාත් සභා සහ පළාත් පාලන අමාත්‍යංශය, කොළඹ මහ නගර සභාව සහ ඉසිපතන විද්‍යාලයේ නිලධාරීන්ගෙන් සමන්විත කමිටුවක් පත්කරන බවයි.
කොළඹ 5, ඉසිපතන විද්‍යාලයේ සිසුන් 4,700 ක් පමණ මේ වනවිට ඉගෙනුම ලබන බව විදුහල්පතිවරයා පවසයි.
මෙතෙක් විද්‍යාලයේ ක්‍රීඩා කටයුතු සිදුකර ඇත්තේ කුලියට ලබාගත් ක්‍රීඩාංගනවලයි. වසර ගණනාවක සිට ශ්‍රී ලංකා රග‍්බි කණ්ඩායමේ ක්‍රීඩකයන්ගෙන් 50 % ක් පමණ තේරීපත්වූයේ ඉසිපතන විද්‍යාලයෙන් බව ද විදුහල්පති ප්‍රේමසිරි ඈපා මහතා පැවසි ය.
COMMENTS