මෙරට සියලුම ජනතාවට නොමිලේ වෛද්‍ය පරීක්ෂණ සිදුකිරීමට අවස්ථාව ලබාදෙන බවත් එය අනිවාර්ය කරන බවත් සෞඛ්‍ය, පෝෂණ හා දේශීය වෛද්‍ය අමාත්‍ය රාජිත සේ...
මෙරට සියලුම ජනතාවට නොමිලේ වෛද්‍ය පරීක්ෂණ සිදුකිරීමට අවස්ථාව ලබාදෙන බවත් එය අනිවාර්ය කරන බවත් සෞඛ්‍ය, පෝෂණ හා දේශීය වෛද්‍ය අමාත්‍ය රාජිත සේනාරත්න මහතා ප්‍රකාශ කරයි.
අමාත්‍යවරයා මේ බව ප්‍රකාශ කළේ ඊයේ (09) ලෝක සෞඛ්‍ය සංවිධානයේ 69 වන නැගෙනහිර ආසියානු කලාපීය කමිටු සැසිවාරය අවසන්වී‍මෙන් පසු මාධ්‍ය වෙත අදහස් දක්වමිනි.
එහිදී අදහස් දැක්වූ අමාත්‍යවරයා කියාසිටියේ මුල් අදියරේදී රුධිර පීඩනය, රුධිරයේ සීනි ප්‍රමාණය, කොලොස්ට්රොල්, බී.එම්.අයි පරීක්ෂණය ආදී පරීක්ෂණ සඳහා රෝහල්වල මධ්‍යස්ථාන ස්ථාපිත කිරීමටත් පසුව ඒවා ග්‍රාමීය රෝහල් දක්වා ව්‍යාප්ත කිරීමටත් බලාපොරොත්තුවන බවයි.
එසේම ඊළඟ අදියරේදී තවත් සෞඛ්‍ය පරීක්ෂණ ගණනාවක් නොමිලේ ඉටුකර ගැනීමට අවස්ථාව සලසාදෙන බවත් මේ සියල්ල සඳහා විශාල පිරිවැයක් දැරීමට සිදුවන නමුත් දීර්ඝ කාලීන වශයෙන් බෝ නොවන රෝග අවම කර ගැනීමට හැකිවන බැවින් එය රටට ඉතා වාසිදායක වනු ඇති බවත් ඒ මහතා පෙන්වා දුන්නේය.
ඒ අනුව 2018 වනවිට මෙම වෛද්‍ය පරීක්ෂණ සඳහා ඉඩ ප්‍රස්ථාව සැලසීමට හා එමගින් 2020 වන විට බෝ නොවන රෝග 10%න් අඩුකර ගැනීමට බලාපොරොත්තුවන බවත් එය 2025 වනවිට 20% දක්වා අඩුකර ගැනීමට හැකිවනු ඇති බවට තමන් විශ්වාස කරන බවත් අමාත්‍යවරයා කියාසිටියේය.
මේ අතර පැණි බීම වර්ගවලට වර්ණ සංකේත යෙදීම අනිවාර්ය කළ පරිදි ඉදිරියේදී ආහාර නිෂ්පාදනවලට වර්ණ සංකේත යොදා ඒවායේ සීනි, ලුණු සහ මේදය අඩංගු ප්‍රමාණයන් දැක්වීම අනිවාර්ය කරන බව ද ඔහු සඳහන් කළේය.
එසේම දැනට දුම්වැටි ආවරණවල දැක්වෙන 80%ක රූපමය අවවාද ඉදිරියේදී 90%ක් දක්වා ව්‍යාප්ත කරන බවත් දුම්වැටි ආවරණවල ඉතිරි 10% තුළ තිබිය යුත්තේ එහි නම පමණක් බවත් ඔහු වැඩිදුරටත් කියාසිටියේය.
වීඩියෝව පහතින්.
COMMENTS