මාරු ලිස්ට් හදන්න යූනියන් ඕනෑ නෑ – සෞඛ්‍ය ඇමැති වෛද්‍ය නලින්ද ජයතිස්ස වෛද්‍ය වර්ජකයින්ට කියයි

රජය වෛද්‍යවරුන් සඳහා විධිමත් ස්ථානමාරු ක්‍රියාවලියක් සකස් කර ක්‍රියාත්මක කරමින් තිබෙන බවත් එය යුනියන්වල වැඩක් නොවන බවත් සෞඛ්‍ය අමාත්‍ය වෛද...

රජය වෛද්‍යවරුන් සඳහා විධිමත් ස්ථානමාරු ක්‍රියාවලියක් සකස් කර ක්‍රියාත්මක කරමින් තිබෙන බවත් එය යුනියන්වල වැඩක් නොවන බවත් සෞඛ්‍ය අමාත්‍ය වෛද්‍ය නලින්ද ජයතිස්ස මහතා පැවසීය.

“මෙවර සෞඛ්‍ය අමාත්‍යාංශය අපේ සෞඛ්‍ය සේවා අධ්‍යක්ෂවරුන් සහ පළාත් සෞඛ්‍ය සේවා අධ්‍යක්ෂවරුන් සම්බන්ධ කරගෙන සාකච්ඡා වට ගණනාවක් කරලා නිර්නායක 7 ක් මත දුෂ්කර සේවා ලැයිස්තුවක් හැදුවා. ඒ ලිස්ට් එක හදන්න සෞඛ්‍ය අමාත්‍යාංශයට වෘත්තීය සංගම් අවශ්‍ය නෑ. ඒක යුනියන්වල වැඩක් නෙමෙයි. ඒක සෞඛ්‍ය අමාත්‍යාංශයේ වැඩක්. ඒ අනුව 265ක ලැයිස්තුවක් සකස් කළා. ඒ ලැයිස්තුව තමයි අපි ප්‍රකාශයට පත් කළේ. ඒකට යූනියන් සම්බන්ධ කරන්න අවශ්‍ය නෑ”යැයි ද ඇමැතිවරයා කියා සිටියේය.

රජයේ වෛද්‍ය නිලධාරීන්ගේ සංගමය විසින් ආරම්භ කර ඇති වැඩ වර්ජනය සම්බන්ධව මාධ්‍යවේදියකු ඊයේ (31) පැවති කැබිනට් තීරණ දැනුම්දීමේ ප්‍රවෘත්ති සාකච්ඡාවේදී මතුකළ ප්‍රශ්නයකට පිළිතුරු දෙමින් අමාත්‍යවරයා මේ බව කීවේය. එහිදී අදහස් දක්වමින් අමාත්‍යවරයා පැවසුවේ ලබන මැයි 10 වැනිදා වනවිට ස්ථාන මාරු කිරීමට වෛද්‍යවරුන් 6,000ක ප්‍රමාණයක් සිටින බවය.

එමෙන්ම සිදුකරමින් පවතින ස්ථානමාරු ක්‍රියාවලිය තුළින් අදාළ සංගමයේ ක්‍රියාකලාපයන් නිසා අසාධාරණයට ලක්වූ වෛද්‍යවරුන් රැසකට සාධාරණයක් වෙමින් පවතින බවද අමාත්‍යවරයා පෙන්වා දුන්නේය.

“මැයි 10 වෙනකොට වෛද්‍යවරුන් 6,000ක් පමණ මාරුවීමට නියමිතයි. ඒක පෙබරවාරි පළවෙනි සතියේ පටන් ගත්තේ. මේ ආකාරයට විධිමත් ක්‍රියාවලියක් පසුගිය වසර 13 ම සිදුවෙලා තිබුණේ නෑ. ඔය ට්‍රාන්සර් බෝඩ්වල හිටියයි කියලා කිව්වාට ඒ සංගමයේ සාමාජිකයෝ සමහර තැන්වල අවුරුදු 13-17 හිටියා. අක්ෂි රෝහලේ හිටියා තමන්ට නියමිත ජාතික රෝහලට පාරෙන් පැනලා යන්න බැරුව. ඒ නිසා මේ සියලු අක්‍රමිකතාවන් නතර කරලා වාර්ෂික ස්ථානමාරු ක්‍රියාවලියක් ක්‍රියාත්මක කරමින් යනවා. මේකෙන් බහුතරයක් අසාධාරණයට ලක්වෙලා හිටපු වෛද්‍යවරුන්ට සාධාරණයක් වෙන නිසා ඒ අය කැමැතියි. මේකට අකැමැති වෙන්නේ තමන්ගෙ බලය පාවිච්චි කරලා තමන්ගේ විධායක සභාවේ සාමාජිකයෝ, තමන්ගේ සාමාජිකයන්ගේ බිරින්දෑවරුන් තමන්ට කැමැති කැමැති තැන්වල අවුරුදු ගාණක් රඳවගෙන හිටපු අය. ඒ නිසා අදාළ ස්ථානමාරු ක්‍රියාවලිය ක්‍රියාත්මක කරමින් යනවා.