දැනට රට තුළ පවතින දේශපාලන අස්ථාවරභාවය හමුවේ උතුරු නැගෙනහිර දෙමළ ප්‍රශ්නයට දේශපාලන විසදුමක් අපේක්ෂා කිරීම අර්ථ ශූන්‍ය ක්‍රියාවක් යැයි දෙමළ ...
දැනට රට තුළ පවතින දේශපාලන අස්ථාවරභාවය හමුවේ උතුරු නැගෙනහිර දෙමළ ප්‍රශ්නයට දේශපාලන විසදුමක් අපේක්ෂා කිරීම අර්ථ ශූන්‍ය ක්‍රියාවක් යැයි දෙමළ ජාතික සන්ධානයේ ප්‍රකාශක හිටපු පාර්ලිමේන්තු මන්ත්‍රී එම්.ඒ.සුමන්තිරන් මහතා පවසයි.
යාපනයේ මාධ්‍යවේදීන්ට අදහස් දක්වමින් 18 දා සවස මේ බව පැවසූ සුමන්තිරන් මහතා කියා සිටියේ පසුගිය රජය නව ව්‍යවස්ථා සංශෝධනයක් තුළින් උතුරු නැගෙනහිර ප්‍රශ්නයට යම් විසදුමක් සෙවීමට උත්සහ කළත් මේ වන විට ජනාධිපතිවරයාත් වත්මන් රජයත් මුහුණ පා සිටින අනපේක්ෂිත දේශපාලන ව්‍යාකූලතාවය මැද දෙමළ ජනතාවගේ අභිවෘද්ධිය වෙණුවෙන් ව්‍යවස්ථා සංශෝධනයක් කරා යාමට කිසි සේත්ම හැකියාවක් නොමැති බවයි.
ඉදිරි කාලයේදීද විශ්වාස භංග යෝජනා දෝෂාභියෝග වැනි කාරණා වලට පාර්ලිමේන්තුවේ කාලය කා දැමීමක් සිදුවනු ඇතැයි තමන් අපේක්ෂා කරණ බව කී සුමන්තිරන් මහතා දෙමළ ජනතාවගේ සුබ සිද්ධිය සදහා නොව රටේම සුබ සිද්ධිය සදහා මේ කාලය තුළ වැදගත් යමක් සිදු වෙතැයි තමන් අපේක්ෂා නොකරණ බවද කියා සිටියේය.
මේ අවස්ථාවේදී ජනාධිපතිවරයාට ඇති බලතල උපයෝගී කරගෙන මේ අවාසනාවන්ත ලෙස සිදු වූ දේශපාලන ව්‍යාකුලතාවයට පිළියම් සෙවිය හැකි නමුත් ඔහු පෞද්ගලික එදිරිවාදීකම් මත එවැනි තීරණයකට එළඹෙන බවක් පෙනෙන්නට නැතැයිද මෙහිදී කියා සිටියේය.
(දිනසේන රතුගමගේ)
COMMENTS