‘සිංහ පොඩ්ඩෝ’ පාකිස්තානුවන් මුලික වටයෙන්ම ඉවතට විසි කරයි..අපරාජිතව අවසන් පූර්ව තරගයට…

වයස 19 න් පහළ ආසියානු කුසලාන ක්‍රිකට් තරගාවලියේ ‘බී’ කාණ්ඩයේ තරගයක් ලෙස ශ්‍රී ලංකාව සහ පාකිස්තානය අතර අද (2 වැනිදා) චිතගොංග්හිදී පැවැති තර...

වයස 19 න් පහළ ආසියානු කුසලාන ක්‍රිකට් තරගාවලියේ ‘බී’ කාණ්ඩයේ තරගයක් ලෙස ශ්‍රී ලංකාව සහ පාකිස්තානය අතර අද (2 වැනිදා) චිතගොංග්හිදී පැවැති තරගයෙන් ලකුණු 23 ක  ජයක් අත්කර ගැනීමට ශ්‍රී ලංකා යොවුන් කණ්ඩායම සමත් විය.එම ජයත් සමග ශ‍්‍රී ලංකා යොවුන් පිල ‘බී’ කාණ්ඩයේ පෙරමුණ ගනිමින් අවසන් පූර්ව තරගයට සුදුසුකම් ලැබීමට සමත්වු අතර පාකිස්තානු කණ්ඩායමට ආසියානු කුසලානයේ මුලික වටයෙන්ම ඉවත්විමට සිදුවිය.

ජයග‍්‍රහණය සදහා ලකුණු 201 හඹා ගිය පාකිස්තානු යොවුන් ක‍්‍රීඩකයින්ට ශ‍්‍රී ලංකා පන්දුයවන්නන් හමුවේ නියමිත පන්දුවාර 50 තුළ කඩුලු 08ක් දැවී ලබාගත හැකි වුයේ ලකුණු 177ක් පමණි. වැඩිම ලකුණු ලාභියා වූ අවෙයිස් සෆාර් එක් හයේ පහරක් හා හතරේ පහරක් සමගින් ලකුණු 43ක් රැස් කළේය. පන්දු යැවීමේදී නවෝද් පරණවිතාරණ,දුලිත් වෙල්ලාලගේ හා කල්හාර සෙනරත්න කඩුලු 02 බැගින් බිද දැමීමට සමත්විය.

පාකිස්තානු කණ්ඩායමේ ඇරයුමෙන් පළමුවෙන් පන්දුවට පහරදුන් ශ‍්‍රී ලංකා යොවුන් පිළ පන්දුවාර 49.4කදී සියලු දෙනා දැවී ලකුණු 200ක් ලබාගැනීමට සමත්විය. ඉනිමේ වැඩිම ලකුණු ලාභියා වූ කලන පෙරේරා පන්දු 61කදී හයේ පහර 03ක් හා හතරේ පහර 04ක් සමගින් ලකුණු 51ක් රැස් කළේය. විටෙක ලකුනු 146කට කඩුලු 07ක් දැවී අසරණව සිටි යොවුන් පිලට බලාපොරොත්තු එක්කල නායක නිපුන් ධනංජය(33) හා නිපුන් මාලිංග(26) 08 වැනි කඩුල්ලට ලකුණු 39ක් එක්කරමින් ශ‍්‍රී ලංකා ලකුණු පුවරුව ඉහළ දැමීමට සමත්විය.

පාකිස්තානු කණ්ඩායම වෙනුවෙන් විශිෂ්ට පන්දු යැවීමට නිරත වූ අශාඩ් ඉක්බාල් ලකුනු 35කට කඩුලු 06ක් දවා ගැනිමට සමත්විය.