එක්සත් ජාතික පක්ෂය හා ශ්‍රී ලංකා පොදුජන පෙරමුණේ (පොහොට්ටුව) අධි තක්සේරුවකින් කටයුතු කරන බව ජනාධිපති මෛත්‍රීපාල සිරිසේන මහතා පවසයි. පස...
එක්සත් ජාතික පක්ෂය හා ශ්‍රී ලංකා පොදුජන පෙරමුණේ (පොහොට්ටුව) අධි තක්සේරුවකින් කටයුතු කරන බව ජනාධිපති මෛත්‍රීපාල සිරිසේන මහතා පවසයි.
පසුගියදා කොළඹ පැවැති ශ්‍රී ලංකා පොදුජන පෙරමුණේ (පොහොට්ටුවේ) උද්ඝෝෂණය ගැන සඳහන් කරමින් ජනාධිපතිවරයා එසේ කියාසිටියේ, නිවිතිගල මහජන පොළ භූමියේ ඊයේ (08) පෙරවරුවේ පැවැති ශ්‍රීලනිප තරුණ බල මණ්ඩලයේ රැස්වීම අමතමිනි.
'' පොහොට්ටුවේ අය එය සාර්ථක බව පවසන නමුත්, එජාපය පවසන්නේ එය අසාර්ථක වූ බවයි'', මොවුන් දෙපිරිසම අධිතක්සේරුවකින් කටයුතු කරන බව කී ජනපතිවරයා, මී ළඟ මහ මැතිවරණයේදී ආණ්ඩුවක් පිහිටුවීමේදී ශ්‍රී ලංකා නිදහස් පක්ෂය ප්‍රධාන සාධකයක් වන බවද කීය.
ඒ සඳහා උදාහරණ දැක්වූ ජනපතිවරයා කියාසිටියේ පෙබරවාරි 10වනදා පැවැති පළාත් පාලන මැතිවරණයේදී පොහොට්ටුව පක්ෂය ලබාගත් ඡන්ද සංඛ්‍යාව අනුව එම පක්ෂයට මහ මැතිවරණයකදී ලබාගත හැකිවන්නේ ආසන 102ක් බවය.
එම මැතිවරණයේදී ශ්‍රී ලංකා නිදහස් පක්ෂය ඡන්ද ලක්ෂ 15ක් ලබාගත් බවද, එය මේ වනවිට ලක්ෂ 20 දක්වා වැඩිකරගෙන ඇතැයිද ජනාධිපතිවරයා කීය.
''හොඳ අග්‍රාමාත්‍යවරයෙක් පත්කර ගත යුතුයි''
ආණ්ඩුක්‍රම ව්‍යවස්ථාවේ 19 වන සංශෝධනයට අනුව මීළග ජනාධිපතිවරණයකින් පසු ජනාධිපතිවරයාගේ බලතල ඉතා සීමිත වන බවත් රටේ ප්‍රධාන තනතුර වන්නේ අග්‍රාමාත්‍ය ධුරය බවත්, ඒ අනුව දේශපාලන ක්ෂේත්‍රයේ සියලුදෙනාගේ සංවාදයට සහ සාකච්ඡාවට ලක්විය යුත්තේ මීළග ජනාධිපතිවරණයක් පිළිබඳව නොව රටට හොද අගමැතිවරයෙක් තෝරා පත් කර ගැනීම පිළිබඳව බවද ජනපති මෛත්‍රී මෛත්‍රීපාල සිරිසේන මහතා එහිදී අවධාරණය කර සිටියේ ය.
කෙසේවුවද ජනාධිපතිවරණය නියමිත කාලයට දිනකට හෝ පෙර නොපවත්වන බව පැවසු ජනාධිපති මෛත්‍රීපාල සිරිසේන මහතා, ශ්‍රී ලංකා නිදහස් පක්ෂයේ සහය නොමැතිව කිසිවෙකුටත් ආණ්ඩුවක් පිහිටුවිය නොහැකි බව මෙහිදී අවධාරණය කළේය.
මහින්ද එකඟ කරගැනීමට දිගටම සාකච්ජා !
මේ අතර මීලග ජනාධිපතිවරණ අපේක්‍ෂකත්වය මෛත්‍රීපාල සිරිසේන මහතාට ලබා දී අගමැතිකම මහින්ද රාජපක්‍ෂ මහතාට ලබා දීමට 15 කණ්ඩායම ඉදිරිපත් කර ඇති යෝජනාව සම්බන්ධයෙන් ඒකාබද්ධයේ නායකයින් අතර මේදිනවල තීරණාත්මක සාකච්ජා වටයක් පැවැත්වෙන බව එහි අභ්‍යන්තර ආරංචිමාර්ග පවසයි.
නව ආණ්ඩුවක තනතුරු බෙදා ගන්නා ආකාරය සම්බන්දයෙන් මේ වන තෙක් අවසන් එකගතාවයට පැමිණ නැති නිසාත්, මීලග ජනාධිපතිවරණයේදී පොහොට්ටුවේ අපේක්‍ෂකයෙකු ඉදිරිපත් කළ යුතු යයි එම පක්ෂයේ ප්‍රධානින් දැඩි ස්ථාවරයක සිටිම නිසාත් මේ සම්බන්ධයෙන් මෙතෙක් අවසන් තීරණයකට එළඹ නොමැති බවද එම ආරංචිමාර්ග කියා සිටියි.
කලින් ජනපතිවරණ නැතැයි ජනපති කියයි
මේ අතර නියමිත කාලයට කලින් ජනාධිපතිවරණයක් පවත්වන්නේ නම් ඒ පිළිබඳ තීරණය කළ යුත්තේ තමා බවත්, නියමිත කාලයට දවසකට හෝ කලින් ඡන්දයක් නොපවත්වන බවත් ජනාධිපති මෛත්‍රීපාල සිරිසේන මහතා ඊයේ (08) අවධාරණය කළේය.
ජනාධිපතිවරයා මේ බව සඳහන් කළේ රත්නපුර, නිවිතිගල ශ්‍රී ලංකා නිදහස් පක්ෂ මධ්‍යම බල මණ්ඩල රැස්වීම අමතමිනි.
COMMENTS