දේශපාලන අරමුණු වෙනුවෙන් ආණ්ඩුව තමන්ට අවශ්‍ය ආකාරයට විගණන පනත සම්මත කරගෙන ඇති බව ජනතා විමුක්ති පෙරමුණ පවසයි. ඊයේ (08) පැවති මාධ්‍ය හමුවකට ...
දේශපාලන අරමුණු වෙනුවෙන් ආණ්ඩුව තමන්ට අවශ්‍ය ආකාරයට විගණන පනත සම්මත කරගෙන ඇති බව ජනතා විමුක්ති පෙරමුණ පවසයි.
ඊයේ (08) පැවති මාධ්‍ය හමුවකට එක් වෙමින් ජනතා විමුක්ති පෙරමුණේ පාර්ලිමේන්තු මන්ත්‍රී සුනිල් හදුන්නෙත්ති මහතා මේ බව ප්‍රකාශ කළේය.
මුල් පනත සහ සම්මත වූ පනත අතර පැහැදිලි පරස්පරතාවයක් තිබෙන බවද ඒ මහතා ප්‍රකාශ කළේය.
විගණනයේදී වැරදිකරුවෙක් ලෙස හඳුනාගන්නා පුද්ගලයෙක්ගෙන් එම දණ්ඩණය අය කර ගනීමේ බලය විගණන කොමිසමට තිබිය යුතු බවත් පනත අනුව එම බලය අමාත්‍යංශ ලේකම්වරුන්ට පවරා ඇති බවද සුනිල් හදුන්නෙත්ති මහතා පැවසීය.
අප විසින් ඉදිරිපත් කළ සංශෝධන ආණ්ඩුව ඉදිරිපත් කළ සංශෝධන ආකාරයෙන් ඉදිරිපත් කර ඇති බවද ඒ මහතා වැඩිදුරටත් ප්‍රකාශ කළේය.
එහිදී ඒ මහතා මෙසේ අදහස් දැක්විය.
“ආණ්ඩුව විසින් තමන්ගේ දේශපාලන අරමුණු වෙනුවෙන් මේ පනත තමන්ට අවශ්‍ය ආකාරයට තමයි දැන් සකස් කරලා තියෙන්නේ. මුල් පනත් කෙටුම්පතේ තිබිච්ච අඩංගුව සහ දැන් මේ සම්මත වෙච්ච එක පැහැදිලි පරස්පරයක් තියෙනවා. එක වගන්තියක් තියෙනවා විගණකාධිපතිවරයාට යම් රාජ්‍ය නිලධාරියෙක් වැරදි අසත්‍ය තොරතුරු සැපයුවොත් ඒ අධිකරණ ක්‍රියාවලියකින් ඔහු වැරදිකරු කියලා ඔප්පු වුනෝතින් උපරිම දඩය රුපියල් ලක්ෂයක් මේ පනතේ යෝජනා කරලා තියෙනවා. දැන් ආණ්ඩුවම යෝජනාවක් ගේනවා ඒක 5000ට අඩු කරන්න. අපි සංශෝධනයක් ගේනවා අවම දඩය 5000ක් වෙන්න ඕනේ. කෑගහලා කෑගහලා යන්තම් 5000 25000 කර ගත්තා. ඒ විගණනයේදී වැරදිකරුවන් හැටියට අඳුරගන්න පිරිස්වලට ඒ දණ්ඩනය අය කර ගැනීමේ බලය තියෙන්න ඕනේ විගණන කොමිසමට. හැබැයි විගණන කොමිසමට තිබ්බ ඒ බලය ආණ්ඩුව භාර දීලා තියෙනවා අමාත්‍යංශ ලේකම්වරුන්ට.”
“ලේකම්වරයා වරදක් කලොත් මේකේ අධිභාර පනවන්න යෝජනා කරලා තිබුණේ ජනාධිපතිවරයාට. අනික ජනාධිපතිතුමාම තමයි ලේකම්වරු පත් කරන්නේ. එතකොට ඒ ජනාධිපතිතුමාම ලේකම්වරයාට අධිභාර පනවන්නේ නැහැනේ. ආණ්ඩුව මොකද කළේ අපෙන් ගත්ත සංශෝධන ටික ආණ්ඩුවේ සංශෝධන හැටියට ඉදිරිපත් කළා. මගේ කලිසම ඌ ඇඳගෙන උගේ වගේ යනවා කියලා. විශේෂයෙන් කැබිනට් මණ්ඩලය නොදන්න වැඩක් කරන්න ගිහිල්ලා හත්පොලේම ගාගෙන තියෙන්නේ මේ.”යැයිද ඒ මහතා වැඩිදුරටත් පැවසීය.
COMMENTS