කුරුමිණියෙක් කළ හදියක්! රුසියාව ලංකා තේ තහනම් කරයි.

පසුගිය බ්‍රහස්පතින්දා රුසියානු ෆෙඩරේෂනය විසින් ලංකාවෙන් අපනයනය කරන තේ සඳහා මෙම හදිසි තහනම පැනවූයේ තේ අසුරණයක් තුළින් කුරුමිණියෙක් හමුවීම ...

පසුගිය බ්‍රහස්පතින්දා රුසියානු ෆෙඩරේෂනය විසින් ලංකාවෙන් අපනයනය කරන තේ සඳහා මෙම හදිසි තහනම පැනවූයේ තේ අසුරණයක් තුළින් කුරුමිණියෙක් හමුවීම නිසා ය. මෙම කුරුමිණියා Trogoderma granarium යන විද්‍යාත්මක නාමයෙන් හැඳින්වෙන කෘෂිකාර්මික පලිබෝධකයෙකි. ලෝකයේ වඩාත්ම ආක්‍රමණශීලී පලිබෝධකයෙකු ලෙස සැලකෙන මෙම කෘමියාගේ බාහිර ස්වරූපය කැබිනට්ටුවකට සමාන නිසා ‘කැබිනට් කුරුමිණියා’ ලෙස ද ඇතැම්විට හැඳින්වේ. නමුත් මෙම කුරුමිණියා සාමාන්‍යයෙන් සහල් වගාව වැනි ධාන්‍ය ආශ්‍රිතව මිස තේ වගාව ආශ්‍රිතව දැකගත හැකි පලිබෝධකයෙක් නොවේ.

මේ අනුව මෙම කුරුමිණියා තේ කන්ටේනරය තුළට පිවිසියේ කෙසේද යන ප්‍රශ්නය මතුවන අතර තේ මණ්ඩල බලධාරීන් පවසන්නේ තේ ප්‍රවාහනය සඳහා යොදාගත් කන්ටේනරය හෙවත් බහාලුම මීට පෙර ධාන්‍ය පිටරට යැවීම සඳහා භාවිතා කළ එකක් වන්නට ඉඩ ඇති බවයි.

තවද හමු වී තිබෙන්නේ එක් කුරුමිණියෙක් පමණක් බවත්, මෙය හුදෙකලා සිද්ධියක් පමණක් යැයි තමන් විශ්වාස කරන බවත් තේ බලධාරීහු කියා සිටිති.

තාවකාලික තහනමක් වශයෙන් සඳහන් වුවද රුසියාව විසින් මෙම තහනම ඉවත් කර ගන්නේ කවදාද යන්න පිළිබඳ ව මෙතෙක් පැහැදිලි කිරීමක් ලැබී නැත. විශ්වාස කෙරෙන්නේ ලංකා තේ මණ්ඩලය අදාළ රුසියානු බලධාරීන් සමග සාකච්ඡා පවත්වා මෙම අර්බුදය පිළිබඳ එකඟතාවයකට පැමිණෙන තෙක් තහනම බලපැවැත්වෙනු ඇති බවයි. වතු කර්මාන්ත අමාත්‍යාංශය මෙන්ම විදේශ කටයුතු අමාත්‍යාංශය සහ වාණිජ කටයුතු දෙපාර්තමේන්තුව ද මේ වන විට දෙරට අතර වාණිජ සබඳතා නැවත යථා තත්වයට පත් කළ හැකි ආකාරය සොයා බලමින් සිටියි.

මෙම අර්බුදය හැකි ඉක්මනින් විසඳීම සඳහා වතු කර්මාන්ත ඇමති නවීන් දිසානායක මහතා රුසියාව බලා යාමට නියමිත බව වාර්තා වේ.

මෙම ප්‍රශ්නයේ බරපතළකම වන්නේ රුසියාව ලංකා තේවල දෙවැනි විශාලතම ගැනුම්කරුවා බවට පසුගිය වසරේ පත් ව සිටි නිසා ය. ලංකා තේවල පළමු ගැනුම්කරුවා ඉරානයයි. රුසියාව 2016 වසරේදී ඇමරිකානු ඩොලර් මිලියන 143 ක ලංකා තේ ආනයනය කර තිබූ අතර, එය ලංකාවේ සමස්ත තේ අපනයනයෙන් 11.3% ක් විය.

ශ්‍රී ලංකා තේ මණ්ඩලයේ නිල වෙබ් අඩවියේ තේ මණ්ඩලය පිළිබද හැදින්වීම ආරම්භ වනුයේ ''Tea is serious business in Sri Lanka'' යනුවෙනි. සැබවින්ම තේ, ලංකාව තුළ පමණක් නොව ජාත්‍යන්තරයේ ද ‘සීරියස් බිස්නස්‘ එකකි. එනිසා මේ තත්වය තුළ අපනයන තහනම හැකි ඉක්මනින් ඉවත් කර ගැනීම ද සීරියස් කාර්යයක් සේ ගෙන තේ කර්මාන්තයේ නිරත ලක්ෂ සංඛ්‍යාත ජනතාවගේ ජීවිකාවන් මෙන්ම සිලෝන් ටී සදහා ජාත්‍යන්තරයේ පැවති කීර්ති නාමය ද රැක ගැනීම කෙරෙහි බලධාරීන්ගේ අවධානය යොමු වනු ඇතැයි අපි බලාපොරොත්තු වෙමු.

- අමාලි ජයවීර