විදේශිකයන්ට ඉඩම් හිමිකම අහිමි කළ රාජපක්ෂ නීතිය ඇතුළු රටේ ආර්ථිකයට බලපාන නීති ගණනාවක් අයවැයෙන් වෙනස්වන ලකුණු

විශේෂයෙන්ම බදුකරණය පිළිබඳ නීති වෙනස් වන ආකාරය තාක්ෂණික සටහන්වල දෙවැනි කොටසේ දැක්වේ. එම ලැයිස්තුවට මෙසේ ය. අලුතින් පැනවීමට අපේක්ෂිත පනත...

විශේෂයෙන්ම බදුකරණය පිළිබඳ නීති වෙනස් වන ආකාරය තාක්ෂණික සටහන්වල දෙවැනි කොටසේ දැක්වේ. එම ලැයිස්තුවට මෙසේ ය.

අලුතින් පැනවීමට අපේක්ෂිත පනත්:-
*වගකීම් කළමනාකරණ පනත
*රාජ්‍ය මූල්‍ය කළමනාකරණ පනත
*ජාතික විගණන පනත
*කොටස් වෙළඳපොල සාමුහික කිරීම වැලැක්වීමේ පනත
*සුරැකුම්පත්කරණ පනත
*ජාතික විශ්‍රාම අරමුදල් පනත
*සංවර්ධන බැංකු පනත
*රාජ්‍ය ව්‍යාපාර පනත

තවද මේ යටතේ 2011 අංක 43 දරණ ඌන ක්‍රියාකාරී ව්‍යවසායන් හෝ ඌන උපයෝජිත වත්කම් පුනරුදය කිරීමේ පනත අවලංගු කිරීමට අපේක්ෂිත ය. සිය ප්‍රාග්ධනය යොදන ආයෝජකයන් තුළ අවිනිශ්චිත භාවයක් ඇති කරමින් රටෙහි ව්‍යාපාර කිරීමේ පහසුව කෙරෙහි හානිකර ලෙස එය බලපෑම් කිරීම එයට හේතුව වශයෙන් දක්වා තිබේ.

සංශෝධනය කිරීමට අපේක්ෂිත පනත්:-

1987 අංක 03 දරන පොදු කොන්ත්‍රාත් ගිවිසුම් පනත

2014 අංක 38 දරන ඉඩම් සීමා කිරීම සහ බැහැර කිරීමේ පනත:- විදේශීය හිමිකම් සහිත සමාගම්වලට ඉඩම් අයිතිය සීමා කරන මෙම පනත සංශෝධනය කිරීමට යෝජිත ය. මෙය පසුගිය රජය සමයේ ගෙන ආ පනතක් වන අතර, මෙමගින් විදේශිකයන්ට ලංකාව තුළ දේපළ දැරීමේ අයිතිය දැඩි ලෙස සීමා කරනු ලැබුවේ විදේශ ආයෝජකයන් අධෛර්යමත් කරමිනි.

1972 අංක 7 කුලී පනත සහ පසුව එයට එක් වූ සංශෝධන

1958 අංක 2 දරන තේ සහ රබර් වතු (බෙදා වෙන්කිරීම පාලනය කිරීම) පනත පසුව එයට එක් වූ සංශෝධන

1958 අංක 01 දරණ කුඹුරු ඉඩම් පනත සහ 1973 අංක 42 දරන කෘෂිකාර්මික ඉඩම් පනත - මෙම පනත් දෙක සංශෝධනය කිරීමට යෝජනා වී තිබෙන්නේ බෝග විවිධාංගීකරණ සංකල්පය මුල් කර ගනිමිනි. එනම් විවිධ බෝග වගාකිරීමට හැකිවන පරිදි මෙම නීති දෙක වෙනස් කෙරෙනු ඇත.

1954 අංක 15 දරන සාප්පු සහ කාර්යාල සේවක පනත සහ 1941 අංක 27 දරන පඩිපාලක ආඥා පනත

බුන්වත් නීතිය: අධිකරණය ඉදිරියේ බංකොළොත් භාවය ප්‍රකාශ කිරීම පිළිබඳ බුන්වත් නීතියේ දැනට පවතින ප්‍රතිපාදන හේතුවෙන් සමාගම් අසාර්ථක වීමේ ප්‍රවණතාවය පසුගිය කාලයේ දිගින් දිගටම දක්නට ලැබිණි. සුළු හා මධ්‍ය පරිමාණ ව්‍යාපාර අධෛර්යමත් කරන මේ තත්වය වළක්වාළීම පිණිස මෙම බුන්වත්භාවය (බංකොළාත්භාවය) පිළිබඳ නීතිය සංශෝධනය කිරීමට නියමිත ය.

සීමිත වගකීම් හවුල් ව්‍යාපාර පිළිබඳ නීති :1866 අංක 21 දරන හවුල් ව්‍යාපාර ආඥා පනත, 1840 අංක 7 දරන වංචා වැලැක්වීමේ ආඥා පනත සහ 2007 අංක 7 දරන සමාගම් පනත ඇතුළුව දැනට මේ සම්බන්ධයෙන් පවතින නෛතික තත්ත්වය විමර්ශනයෙන් පසුව සීමිත වගකීම් හවුල් ව්‍යාපාර ක්‍රමයක් හඳුන්වා දීමට අපේක්ෂිත ය. සීමිත වගකීම් හවුල් ව්‍යාපාර ව්‍යුහය තුළ ආයෝජනය කිරීමට දැනටමත් අභිලාෂය ප්‍රකාශ කර ඇති සමාගම් දිරිමත් කිරීම මෙහි විශේෂ අපේක්ෂාවයි.

පාරිභෝගිකයින්ගේ පහසුව සහ ආරක්ෂාව සහතික කරමින් මූල්‍ය අංශයේ තරඟකාරිත්වය සහ කාර්යක්ෂමතාවය වර්ධනය කිරීමට, 2009 අංක 49 දරන ආරක්ෂිත ගනුදෙනු පනත, 2011 අංක 1 සහ 19 දරන බැංකු මගින් ණය අයකර ගැනීමේ (විශේෂ විධිවිධාන) (සංශෝධිත) පනත, 1935 අංක 19 දරන ඉඩම් සීමා කිරීමේ ආඥා පනත, 1990 අංක 2 දරන ණය අයකරගැනීමේ (විශේෂ විධිවිධාන) පනත, 1981 අංක 98 දරන උකස් පනත සහ 1992 අංක 72 දරන සමථ මණ්ඩල පනත ද සංශෝධනය කිරීමට අපේක්ෂිත ය.

ස්ථාපන මූල්‍ය නීති:- 1949 අංක 58 දරන මූල්‍ය නීති පනත සහ 1988 අංක 30 දරන බැංකු පනත වැනි මූල්‍ය ක්‍රමයට බලපාන නීති අධ්‍යයනය කර රටේ ආර්ථිකය හා මිල ස්ථායිතාවය තහවුරු කිරීම සඳහා සහ සංවර්ධන ප්‍රවාහය වේගවත් කිරීම සඳහා අවශ්‍ය ස්ථාපන මූල්‍ය අංශයක් සඳහා මෙම පනත් ශක්තිමත් කරනු ඇත.

- අමාලි ජයවීර