මෙසේ චෝදනා පත්‍ර සංශෝධනය කෙරෙන්නේ විත්තිකරුවන් වෙනුවෙන් පෙනී සිටි කාංචන රත්වත්තේ සහ කාලිංග ඉන්ද්‍රතිස්ස යන නීතීඥවරුන්ගේ ඉල්ලීම් සලකා බැලී...
මෙසේ චෝදනා පත්‍ර සංශෝධනය කෙරෙන්නේ විත්තිකරුවන් වෙනුවෙන් පෙනී සිටි කාංචන රත්වත්තේ සහ කාලිංග ඉන්ද්‍රතිස්ස යන නීතීඥවරුන්ගේ ඉල්ලීම් සලකා බැලීමෙන් අනතුරුවය.
දණ්ඩ නීති සංග්‍රහය යටතට ගැණෙන සාපරාධී සාවද්‍ය පරිහරණය යටතේ චෝදනා ඔප්පු කිරීමට නම් අදාල මුදලින් චූදිතයින්ට මූල්‍යමය ලාභයක් අත් වී ඇති බව ඔප්පු කළ යුතුය. 2015 ජනාධිපතිවරණය ආසන්න කාලයේදී මෙසේ රජයේ මුදල් යොදවා සිල් රෙදි මිලට ගෙන මහින්ද රාජපක්ෂගේ දේශපාලන වාසි තකා බෙදා හැරියාට ලලිත් වීරතුංගට හෝ අනූෂ පැල්පිටට අත් වී ඇති මූල්‍යමය ලාභයක් නොමැති බව පැහැදිලිය. එහෙයින් මෙසේ පොදු දේපළ පනත යටතේ ගොනු කර ඇති නඩුව සාපරාධී සාවද්‍ය පරිහරණය යටතට ගෙන ආ විට සිදු වනු ඇත්තේ ඊළඟ නඩු වාරයේදී ම චූදිතයින් දෙදෙනා නිදහස් වීමය.
එනම්, මෙහිදී සිදුවනු ඇත්තේ රජයේ මුදලින් රුපියල් කෝටි 60ක් තරම් විශාල ප්‍රමාණයක් ජනාධිපතිවරණයේදී හිටපු ජනාධිපතිවරයාට දේශපාලන වාසි තකා භාවිතා කිරීමට තක්කඩියන් දෙදෙනෙකු විසින් ලබාගත් නමුත් නීතිය ඉදිරියේ ඊට වගකිව යුත්තෙකු නොමැති වන සේ තක්කඩින් දෙදෙනා නිදහස් වී යාමයි. මෙහි අහිතකර ම ප්‍රතිඵලය වන්නේ මහාධිකරණයෙහි දැනට විභාග වන සහ ඉදිරියේදී විභාග වීමට නියමිත පොදු දේපළ පනත යටතේ ඇති ඕනෑම නඩුවක් සඳහා මෙය ඉතාමත් ම නරක පූර්වාදර්ශයක් වීමයි. ලලිත්ලා අනුෂලා සඳහා නීතියෙන් හෑරෙන පරවි ගුල් වලින් මීළඟට රිංගීමට නියමිතව ඇත්තේ බැසිල්ලා නාමල්ලා ය. ඊළඟට සිදුවනු ඇත්තේ ආණ්ඩුවේ ජිල් බෝල සෙල්ලම් නිසා බැසිල්ලා නාමල්ලා සියළු චෝදනා වලින් නිදහස් වී ජාතික වීරයින් වීමය.
පොදු දේපළ පනත යනුවෙන් වෙන ම නීතියක් පවතින්නේ බලධාරීන් විසින් මහජන මුදල් අවභාවිතා කිරීම වැළැක්වීම සඳහාය, එසේ අවභාවිතා කළ විට ඊට දඬුවම් දීම සඳහාය. එහෙත් ඕනෑ කෙනෙකුට ඕනෑ හැටියකට ඕනෑ වෙලාවක ඕනෑම දේශපාලනික වාසියක් වෙනුවෙන් ඕනෑම අටමඟුලක් මහජන මුදල් යොදවා මිල දීගෙන ඕනෑ අතේ බෙදන්නටත් ඊට එරෙහිව නීතිය ක්රියාත්මක වෙද්දී නීතිමය ක්‍රියාදාමය සමඟ පිස්සු කෙළින්නටත් හැකිනම් එවන් රටක අවසානයේ වනු ඇත්තේ හිතුමතේට මහජන දේපළ උලා කන්නන් රෑනක් බිහිවීම සඳහා ජනතාව ඉදිරියේ නීතිය විකාරයක් වීමය. යහපාලනය ගැන බරට බරේ 'ලොරි ටෝක්' දෙන ආණ්ඩුව පොදු දේපළ සම්බන්ධයෙන් තකන්නේ මෙතරම් සැහැල්ලුවෙන් ද යන්න ආණ්ඩුවේ පාර්ශ්වයෙන් පැහැදිලි කළ යුතුව තිබේ.
COMMENTS