ඉකුත් ජනවාරි 07 වැනිදා හම්බන්තොට මිරිජ්ජවිල ආයෝජන කලාපයේ රුහුණු සංවර්ධන සැලැස්මට අගමැතිවරයා ඇතුළු ආරාධිතයින්ගේ ප්‍රධානත්වයෙන් මුල්ගල් ත...
ඉකුත් ජනවාරි 07 වැනිදා හම්බන්තොට මිරිජ්ජවිල ආයෝජන කලාපයේ රුහුණු සංවර්ධන සැලැස්මට අගමැතිවරයා ඇතුළු ආරාධිතයින්ගේ ප්‍රධානත්වයෙන් මුල්ගල් තබන අවස්ථාවේදී හම්බන්තොට හා අම්බලන්තොට නගර ඇතුළු අවට ප්‍රදේශවල පොදු දේපලවලට හානි කරමින් කලහකාරී ලෙස හැසිරුනේ යැයි කියමින් අම්බලන්තොට පොලිසිය මගින් අත්අඩංගුවට ගෙන අධිකරණය වෙත ඉදිරිපත් කිරීමෙන් පසු මෙම සැකකරුවන් රිමාන්ඩ් බන්ධනාගාර ගත කරන ලදී.
අද තංගල්ල බන්ධනාගාරයේ සිට සැකකරුවන් 25 දෙනෙකු හම්බන්තොට මහේස්ත්‍රාත්වරයා හමුවට ඉදිරිපත්කිරීමෙන් පසු සුවිශේෂී කරුණු යටතේ 16 වන විත්තිකරු හරේන්ද්‍ර ලක්මාල් අබේවික්‍රමට රුපියල් ලක්ෂ පහ බැගින් වූ ශරීර ඇප තුනක් බැගින් ඇප ලබා දීමට මහේස්ත්‍රාත්වරයා නියෝග කලේය. සෙසු විත්තිකරුවන් යළි පෙබරවාරී මස 27 දක්වා රිමාන්ඩ්භාරයේ තැබිමට හම්බන්තොට මහේස්ත්‍රාත් මංජුල කරුණාරත්න මහතා නියෝග කලේය.
16 වන විත්තිකරුගේ එකම නැගණියගේ විවාහය සිදුවන හෙයින් එය ජීවිතයේ එක් අවස්ථාවක් පමණක් බැවින් එය සුවිශේෂි කරුණක් ලෙස සලකා විත්තිකරුට ඇප ලබාදීමට මහේස්ත්‍රාත්වරයා නියම කලේය.
තවද පසුගිය නඩු වාරයේ දී (30) නීතිඥ වාසුදේව නානායක්කාර මහතාගේ ඉල්ලීම වූ සියලු විත්තිකරුවන් වෙනුවෙන් හඳුනාගැනීමේ පෙරට්ටුවක් පැවැත්විය යුතු බවට කළ ඉල්ලීම ප්‍රතික්ෂේප කරමින් මහෙස්ත්‍රාත්වරයා කියා සිටියේ පොලිසිය මගින් මෙම සැකකරුවන් අත්අඩංගුවට ගෙන අධිකරණයට ඉදිරිපත් කර ඇති හෙයින් එම ඉල්ලීම ප්‍රතික්ෂේප කරනබවයි.
හම්බන්තොට මහේස්ත්‍රාත් අධිකරණය ඉදිරිපිට මාර්ගයේ තාප්පයේ දේශපාලන සිරකරුවන් නිදහස් කරනු මැයෙන් පොස්ටර් අලවා ඇති බවත් කිසිවිටක අධිකරණයට බලපෑම් කලනොහැකි බවත් අධිකරණ නිළධාරියෙක් ලෙස තමා රජකාරි කටයුතු කරන බවත්, දේශපාලන වශයෙන් තීන්දු තීරණ නොගන්නා බවද මගේ රාජකාරිය නීතියට යටත්ව සිදු කරන බවද හම්බන්තොට මහේස්ත්‍රාත් මංජුල කරුණාරත්න මහතා විවෘත අධිකරණයේදී ප්‍රකාශ කලේය.
COMMENTS