උසස් පෙළ කලා අංශයෙන් පෙනී සිටියත් භූගෝල විද්‍යාව, ප්‍රංශ භාෂාව වැනි විෂයන් සදහා මුලසිටම සුදානම් වූ බව ඇය ප්‍රකාශ කළාය. වර්ෂ 2016 උසස...
උසස් පෙළ කලා අංශයෙන් පෙනී සිටියත් භූගෝල විද්‍යාව, ප්‍රංශ භාෂාව වැනි විෂයන් සදහා මුලසිටම සුදානම් වූ බව ඇය ප්‍රකාශ කළාය.
වර්ෂ 2016 උසස් පෙළ ප්‍රතිඵල අනුව කලා අංශයෙන් ප්‍රථම ස්ථානය හිමිකර ගැනීමට පේරාදෙණිය විශ්ව විද්යාලයේ වෛද්‍ය පීඨයේ ජ්‍යේෂ්ඨ කථිකාචාර්ය මහචාර්ය අයි.බී.ගවරම්මන මහතා සහ වෛද්‍ය රුක්මලී ගවරම්මන දෙපලගේ දියණිය වන මහනුවර උසස් බාලිකා විද්යාලයේ රධිනි ඉන්දීවරී දියණිය සමත්වූවාය.
සහෝදරියකගේ සහ සහෝදරයෙකුගෙන් යුතු පවුලේ වැඩිමලා වන රධිනි ඉන්දීවරී කලා අංශයෙන් උසස් පෙළ විභාගයට පෙනී සිට අනාගතයේදී නීතිඥ වෘත්තියට ප්‍රවිශ්ඨවීමට අපේක්ෂා කරන බව පැවසුවාය. උසස් පෙළ විභාගයේ අසීරු විෂයන් අධ්‍යයනය කළත් ඒ සදහා නිරන්තරයෙන් පුහුණුවූ නමුත් විභායගය අසීරු කාර්යයක් යැයි නොසිතා ක්‍රියාකළ බව කී ඇය මෙසේ සදහන් කළාය.
අධ්‍යයන කටයුතුයවලදී පාසලේ ගුරුවරියන්ගෙන් මෙන්ම දෙමාපියන්ගෙන් මට විශාල සහයෝගයක් ලැබුණා. නංගී ද මගේ මිතුරියන් ද අධ්‍යයන කටයුතුවලදී මට උපකාර කළා. මම විශේෂයෙන් බාහිර ක්‍රියා සදහා යොමුවී සිටියේ නැහැ. නමුත් රචනා තරගවලින් සමස්ථ ලංකා ජයග්‍රහණ ලබා තිබෙනවා. එමෙන්ම නාට්‍ය සදහා ද මම සහභාගී වෙනවා.
උසස් පෙළ විභාගය තරමක් අසීරු විභාගයක් වුවත් එය ජීවිතයට කරදරයක් කර ගත යුතු නැහැ. මම වසර ගණනාවක පසුගිය ප්‍රශ්න පත්‍ර සදහා පිළිතුරු ලිව්වා. ඇතැම් විට මම ප්‍රශ්න නිර්මාණය කර ගනිමින් පිළිතුරු සැපයීම කළා. විභාගයේ විවිධ විෂයන් අවසානයේ මම අතපසු වූ දේ පිළිබද කණගාටු වුණේ නැහැ. ඒ සියල්ල අමතක කොට යළි අනෙකුත් විෂයන් සදහා සූදානම් වුණා. අවුරුදු දෙකක් අධ්‍යාපනය ලැබූ සියලු දේ පැය තුනක් වැනි කෙටි කාලයකදී ගොනු කිරීම විභාගයේදී කළ යුතු වෙනවා. එය තරමක් අසීරු වුවත් නංගිලා මල්ලිලාගෙන් මම ඉල්ලා සිටින්නේ විභාගයේදී කිසිදු කම්පනයකට පත් නොවී ඊට මුහුණ දෙන ලෙසයි.
අධ්‍යයන කටයුතු සිදුකරන අතරේ මම චිත්‍රපට නැරඹීම වැනි විනෝදාත්මක දේ කළා. ඒ තුළින් ලෝකයේ රටවල් රැසක් පිළිබද විවිධ තොරතුරු ලබා ගත හැකියි. අපේ රටේ නොමැති වෙනත් රටවල තිබෙන විවිධ තොරතුරු රැසක් මම ඉගෙන ගනු ලැ‍බුවේ අන්තර්ජාතික සම්මාන දිනූ චිත්‍රපට නැරඹීමෙන්.
මට විශ්ෂ්ඨ ප්‍රතිඵලයක් ලබා ගත හැකි යැයි කියා මගේ මිතුරින් කීවා. මම එවැනි විශිෂ්ඨ ජයග්‍රහණයක් අපේක්ෂා කළේ නැහැ. නමුත් මම විදුහලේ ප්‍රථම ස්ථානයට පත්වෙයි කියා සිතුවා. නමුත් එය අභිභවා මේ ලැබූ ජයග්‍රහණය පිළිබදව මම සතුටු වෙනවා. මම කොළඹ විශ්ව විද්යාලයේ නීති පිඨයට ගොස් නීතිඥ උපාධිය ලබා ගැනීමට ද අනාගතයේ එක්සත් ජාතීන්ගේ සංවිධානයේ වෘත්තියකට ප්‍රවේශවීමට ද අපේක්ෂා කරනවා යැයි රධිනි ඉන්දීවරී ගවරම්මන දැරිය ප්‍රකාශ කළාය.
මහනුවර පියාෂෝ උද්‍යානයේ පදිංචි ඇය සිය ප්‍රතිඵල දැනගත් පසු විදුහලට පැමිණ විදුහල්පතිනි මල්කාන්ති අබේගුණසේකර මහත්මිය හමුවූ අතර දැරියට සුභ පැතීම සදහා උත්සවයක් 09 වන දින පෙරවරුවේ මහනුවර උසස් බාලිකා විද්‍යාලීය ශාලාවේදී පැවැත්වීමට නියමිතය.
රධිනි ඉන්දීවරි දැරිය, ඇයගේ මව වන රුක්මලී ගවරම්මන මහත්මිය හා ඇයගේ මව ද මහනුවර උසස් බාලිකා විද්‍යාලයෙන් අධ්‍යාපනය ලැබුවෝ වෙති.
නුවර නදීක දයා බණ්ඩාර
COMMENTS