යුද අපරාධ සම්බන්ධයෙන් සොයා බලා කටයුතු කිරීමට ශ්‍රී ලංකා රජය ගෙන ඇති යාන්ත්‍රණය සම්බන්ධයෙන් හා නව ව්‍යවස්ථා සංශෝධනයක් කෙරෙහි අවධානය යොමුකොට...
යුද අපරාධ සම්බන්ධයෙන් සොයා බලා කටයුතු කිරීමට ශ්‍රී ලංකා රජය ගෙන ඇති යාන්ත්‍රණය සම්බන්ධයෙන් හා නව ව්‍යවස්ථා සංශෝධනයක් කෙරෙහි අවධානය යොමුකොට සියලු ජාතීන්ට එක හා සමානව සැලකීමට දරන උත්සාහය සම්බන්ධයෙන් අමෙරිකානු රජය බෙහෙවින් සතුටු වන බව ශ්‍රී ලංකාවේ සිටින ඇමරිකානු තානාපති අතුල් කේෂාප් මහතා ඊයේ (15) සවස යාපනයේදී පැවසීය.
අමෙරිකානු රජයේ ආධාර මත යාපනයේ ඉඩෙයිකාඩු පළාතේ වෛද්‍ය සායනයක් පැවැත්වීම සදහා ඊයේ යාපනයට පැමිණි අමෙරිකානු තානාපතිවරයා යාපනයේදී ප්‍රභූවරුන් ඇතුලු විශාල පිරිසක් හමුවිය.
ඒ අනුව උතුරු පළාත් සභා ප්‍රධාන අමාත්‍යවරයාව, සභාපතිවරයා සහ සෙසු අමාත්‍යවරුන් ද හමු වූ අමෙරිකානු තානාපතිවරයා පසුව යාපනයේ සෙසු දේශපාලනඥයින්, දෙමළ ජාතික සන්ධානයේ නායක හා විපක්ෂ නායක ආර්.සම්බන්ධන් මන්ත්‍රීවරයා ද හමු වී තිබේ.
යාපනයේදී මහජනතාව අමතමින් අමෙරිකානු තානාපතිවරයා ප්‍රකාශ කොට ඇත්තේ ශ්‍රී ලංකාව දේශපාලන වශයෙන් ශක්තිමත් වෙමින් එළඹෙන ප්‍රශ්න වලට මුහුණදීම පිණිස යොදන ක්‍රියාමාර්ගයන් අගය කළ හැකි බවයි.
එමෙන්ම සෙසු දේශපාලන පක්ෂ විසින් ඊට ලබාදෙන සහය අගය කළ තානාපතිවරයා එහිදී දෙමළ දේශපාලන පක්ෂවල ක්‍රියාවන් ගැනද අගය කරමින් ප්‍රශංසා කොට තිබේ.
ශ්‍රී ලංකාව හා අමෙරිකාව අතර සබඳතාවයන් වසර ගණනාවක් දක්වා දිවයන බවත් යාපනයේ ජනතාව හා අමෙරිකානු ජනතාව අතර සම්බන්ධතා වසර 200කට වඩා පැරණි යැයි ද අතුල් කේෂාප් තානාපතිවරයා මෙහිදී පැවසීය.
මේ දීර්ඝ ඉතිහාසය ඔස්සේම අමෙරිකාව ශ්‍රී ලංකාවට නිරන්තරයෙන්ම උදවු උපකාර කොට ඇති බව පෙන්වාදුන් අමෙරිකානු තානාපතිවරයා තවදුරටත් ශ්‍රී ලංකාවේ ආර්ථික, දේශපාලනික සංස්කෘතික හා සාමාජීය කටයුතු වෙනුවෙන් උපකාර කරන බවද පවසා ඇත.
නමුත් උතුරු පළාත් සභාවේ සභාපති සී.වී.කේ. ශිවඥාණම් මහතා ප්‍රකාශ කරන්නේ අමෙරිකානු තානාපතිවරයාගේ යාපනය සංචාරයෙන් සිදුවුණු කිසිම යහපතක් නොමැති බවයි.
උතුරු පළාත් සභාවේ පිරිස උතුරේ ජනතාවගේ ආර්ථිකය සමෘද්ධිමත් කිරීම පිණිස ආධාර කරන මෙන් ඉල්ලා සිටි අවස්ථාවේදී ඔහු නිහඩව සිටි බවත් සෙසු ප්‍රශ්න ඉදිරිපත් කළ අවස්ථාවේදී තානාපතිවරයා ඒ වෙනුවෙන් කිසිම පොරොන්දුවක් නොවූ බවත් සභාපතිවරයා කියා සිටියේය.
උතුරු පළාත් සභාව විසින් නව ව්‍යවස්ථා සංශෝධනය වෙනුවෙන් රජයට ඉදිරිපත් කරන ලද යෝජනාවලියේ පිටපතක් අමෙරිකානු තානාපතිවරයාට ඉදිරිපත් කළ අවස්ථාවේදී ඔහු ප්‍රකාශ කොට ඇත්තේ රජයට ඒ වෙනුවෙන් කාලයක් අවශ්‍ය බවයි.
ත්‍රස්තවාදය වැළැක්වීමේ පනත අහෝසි කරන බව රජය පැවසුවත් එසේ නොකළ බවද යුද අපරාධ සම්බන්ධයෙන් අන්තර් ජාතික මටටමේ පරීක්ෂණයක අවශ්‍යතාවය ගැනද තවත් කරුණු රැසක් පිළිබදව ද ඇමරිකනු තානාපතිවරයාව දැණුවත් කළත් ඔහු ඒ පිළිබදව ස්ථිර යමක් ප්‍රකාශ නොකළ බවද උතුරු පළාත් සභාවේ සභාපති සී.වී.කේ.ශිවඥාණම් මහතා වැඩිදුරටත් කියා සිටියේය.
දිනසේන රතුගමගේ
COMMENTS