නෙතන්යාහුගේ බලය ගිලිහේ... ඊශ‍්‍රායලයට සභාග ආණ්ඩුවක්!

ඊශ්‍රායලයේ පැවති මහ මැතිවරණයේ ඡන්ද විමසීමෙන් අනතුරුව නිකුත් වූ මූලික නිල නොවන ඡන්ද විමසුම් අනුව, වත්මන් අග්‍රාමාත්‍ය බෙන්ජමින් නෙතන්යාහු හෝ ...

ඊශ්‍රායලයේ පැවති මහ මැතිවරණයේ ඡන්ද විමසීමෙන් අනතුරුව නිකුත් වූ මූලික නිල නොවන ඡන්ද විමසුම් අනුව, වත්මන් අග්‍රාමාත්‍ය බෙන්ජමින් නෙතන්යාහු හෝ ඔහුගේ ප්‍රධාන ප්‍රතිවාදියා වන හිටපු හමුදාපති ගාඩි අයිසන්කොට් යන දෙදෙනාගෙන් කිසිවෙකුටත් ස්ථාවර ආණ්ඩුවක් පිහිටුවීමට අවශ්‍ය බහුතර බලය තහවුරු කර ගැනීමට නොහැකි වී ඇත.

ආසන 120කින් සමන්විත ඊශ්‍රායල නෙසට් පාර්ලිමේන්තුවේ බහුතර බලය තහවුරු කර ගනිමින් පාලන සන්ධානයක් පිහිටුවීම සඳහා අවම වශයෙන් ආසන 61ක් අවශ්‍ය වේ. කෙසේ වෙතත්, ඊශ්‍රායල ‘චැනල් 13’ නාලිකාවේ නවතම ඡන්ද විමසුම් වාර්තාවලට අනුව ප්‍රධාන කඳවුරු දෙකම ආසන 51 බැගින් සම මට්ටමක පසුවන බව ‘ටයිම්ස් ඔෆ් ඊශ්‍රායල්’ පුවත්පත උපුටා දක්වමින් CNBC සඳහන් කර තිබේ. 

අනෙක් අතට ‘චැනල් 12’ සහ ‘කාන් 11’ නාලිකාවල දත්තයන්ට අනුව අයිසන්කොට්ගේ සන්ධානය ආසන 52ක් සහ නෙතන්යාහුගේ පාර්ශ්වය ආසන 50ක් ලබා ගනිමින් ඉතා සුළු පරතරයකින් ඉදිරියෙන් සිටී.

මෙම ප්‍රධාන කඳවුරු දෙකටම අයත් නොවන අරාබි නායකත්වයෙන් යුත් දේශපාලන පක්ෂ මෙවර ආසන 17ත් 18ත් අතර ප්‍රමාණයක් දිනා ගැනීමට සමත්ව ඇති බවට පුරෝකථනය කර ඇති අතර, එය ඔවුන් මැතිවරණ ඉතිහාසයේ වාර්තා කළ ඉහළම ප්‍රතිඵලයයි. 

ඒ අනුව ඉදිරියේදී සභාග ආණ්ඩුවක් පිහිටුවීමේදී ඔවුන් තීරණාත්මක බලවේගයක් බවට පත්වනු ඇතැයි සැලකේ. "අපගේ ඡන්ද බලයෙන් ආණ්ඩුව වෙනස් කරනවා" යනුවෙන් රා'අම් පක්ෂ නායක මන්සූර් අබ්බාස් ප්‍රකාශ කර ඇති අතර, නෙතන්යාහු නැවත බලයට පත්වීම වැළැක්වීමේ සැලසුම් පිළිබඳව ඒකාබද්ධ ලැයිස්තු කණ්ඩායමේ සභාපති අහමඩ් ටිබි මීට පෙර අදහස් පළ කර තිබිණි.

හිටපු හමුදා මාණ්ඩලික ප්‍රධානියෙකු මෙන්ම ‘යාෂාර්’ පක්ෂයේ නායකයා වන ගාඩි අයිසන්කොට් දැනටමත් ජයග්‍රහණය ප්‍රකාශ කර ඇති අතර, නව රජයක් පිහිටුවීමේ පළමු අවස්ථාව තමන්ට හිමි විය යුතු බව කියා සිටියි. "මෙම මූලික ඡන්ද විමසුම් ප්‍රතිඵල මඟින් පෙන්නුම් කරන්නේ නෙතන්යාහු සහ ඔහුගේ ඔක්තෝබර් 7 ආණ්ඩුව කෙරෙහි ජනතාව තුළ පවතින සම්පූර්ණ විශ්වාසභංගයයි," යනුවෙන් ඔහු ‘X’ පණිවිඩයක් නිකුත් කරමින් පවසා ඇත.

කෙසේ වෙතත්, මේවා නිල මැතිවරණ ප්‍රතිඵල නොවන අතර නිල ප්‍රකාශනය නොවැම්බර් 04 වනදා සිදු කිරීමට නියමිතය. මධ්‍යම මැතිවරණ කමිටුව සඳහන් කරන පරිදි මෙවර ඡන්දය ප්‍රකාශ කිරීමේ ප්‍රතිශතය 77.7%ක් ලෙස සටහන්ව ඇති අතර, එය වසර 27කට පසු ඊශ්‍රායල මැතිවරණයක වාර්තා වූ ඉහළම ඡන්ද ප්‍රතිශතය වේ.

මෙම මැතිවරණය ඊශ්‍රායලයට අතිශය තීරණාත්මක එකක් වන්නේ, 2023 ඔක්තෝබර් 7 වන දින හමාස් සංවිධානය එල්ල කළ ප්‍රහාරයෙන් පසුව මෙන්ම ගාසා තීරය, ලෙබනනය සහ ඉරානය සමඟ හටගත් බහුවිධ යුද ගැටුම්වලින් අනතුරුව ඊශ්‍රායලයේ පැවති පළමු මහ මැතිවරණය මෙය වන බැවිනි. එය 2009 වසරේ සිට එරට දේශපාලනයේ නොසැලී සිටි බෙන්ජමින් නෙතන්යාහුගේ නායකත්වය පිළිබඳ ජනමත විචාරණයක් බඳු විය.

නෙතන්යාහුගේ පාක්ෂිකයන් යුද සමයේ ඔහුගේ දැඩි නායකත්වය සහ ජාත්‍යන්තර බලපෑම් හමුවේ නොසැලී සිටීම අගය කරද්දී, විවේචකයන් පෙන්වා දෙන්නේ ඔහුට එරෙහිව පවතින දීර්ඝකාලීන දූෂණ නඩු, අධිකරණ පද්ධතිය සංශෝධනය කිරීමට ගත් මතභේදාත්මක උත්සාහයන් මෙන්ම ගාසා යුද්ධය මෙහෙයවූ ආකාරය නිසා ඔහු නැවත එම ධුරයට නුසුදුසු බවයි. තවද ගාසා යුද මෙහෙයුම් සම්බන්ධයෙන් ජාත්‍යන්තර අපරාධ අධිකරණය  විසින් ඔහුට එරෙහිව නිකුත් කර ඇති අත්අඩංගුවට ගැනීමේ වරෙන්තුව ද නෙතන්යාහු සම්පූර්ණයෙන්ම ප්‍රතික්ෂේප කර ඇත.

විශ්ලේෂකයන්ට අනුව, අයිසන්කොට් ඉදිරියෙන් සිටියද අරාබි සහ වාමාංශික පක්ෂ නොමැතිව ඔහුට ආණ්ඩුවක් පිහිටුවීම අසීරු වනු ඇත. එහෙත් අයිසන්කොට්ගේ සන්ධානයේ සිටින ‘යිස්රායෙල් බෙයිතේනු’ පක්ෂ නායක අවිග්ඩෝර් ලිබර්මාන් (ආසන 7-9ක් අපේක්ෂිත) අරාබි පක්ෂ මත යැපීම තරයේ ප්‍රතික්ෂේප කර තිබේ. අනෙක් පසින්, අරාබි ඡන්දදායකයන්ගේ ප්‍රබල සහභාගිත්වය පිළිබඳව නෙතන්යාහුගේ අන්ත දක්ෂිණාංශික සන්ධානය අනතුරු අඟවා තිබූ අතර විපක්ෂය එය ජාතිවාදී ප්‍රකාශයක් ලෙස හෙළා දැක ඇත.

නව රජයක් පිහිටුවීම කල්දමමින් නෙතන්යාහු සිය දේශපාලන පැවැත්ම වෙනුවෙන් ඉදිරි සති කිහිපය තුළ උපරිම අරගලයක යෙදෙනු ඇති බව සිංගප්පූරුවේ එස්. රාජරත්නම් ජාත්‍යන්තර අධ්‍යයන ආයතනයේ ජ්‍යෙෂ්ඨ පර්යේෂක අමීන් සයිකාල් CNBC වෙත පවසා තිබේ. කවුරුන් බලයට පත්වුවද ඉරානය, පලස්තීනය සහ ජාතික ආරක්ෂාව පිළිබඳ ඊශ්‍රායලයේ ප්‍රතිපත්තිවල විශාල වෙනසක් නොවනු ඇතැයි දේශපාලන විචාරකයෝ මත පළ කරති.