රජයෙන් පොලිසියට බලපෑම් කරන්නේ නීතිය ක්‍රියාත්මක කරන්න කියලා විතරයි… එහෙම තියෙද්දිත් නීතිය ක්‍රියාත්මක නොකරන නිලධාරීන්ට දැඩි පියවර ගන්නවා… පොලිස්පති කියයි!

මේ වනවිට රජයෙන් පොලිසියට ඇති එකම බලපෑම නීතිය නිසි ලෙස ක්‍රියාත්මක කරන ලෙස සිදුකරන බලපෑම පමණක් බවත් මේ වටපිටාව තුළත් නීතිය ක්‍රියාත්මක නොකෙ...

මේ වනවිට රජයෙන් පොලිසියට ඇති එකම බලපෑම නීතිය නිසි ලෙස ක්‍රියාත්මක කරන ලෙස සිදුකරන බලපෑම පමණක් බවත් මේ වටපිටාව තුළත් නීතිය ක්‍රියාත්මක නොකෙරෙන්නේ නම් එය පොලිසියේ දුර්වලතාවයක් බවත් පොලිස්පති ප්‍රියන්ත වීරසූරිය පැවසුවේය. අපරාධ මගහැරීම සඳහා කිසිම අවස්ථාවක තමන්ගෙන් උපදෙස් නොලැබෙන බව අවධාරණය කළ පොලිස්පතිවරයා එවැනි වටපිටාවක් තුළත් නීතිය ක්‍රියාත්මක නොකරන දුර්වල නිලධාරීන්ට එරෙහිව දැඩි පියවර ගන්නා බව කීවේය.

පොලිස්පතිවරයා මේ බව පැවසුවේ අද උදේ මල්වතු අස්ගිරි මහා නායක හිමිවරු බැහැදැක ආශීර්වාද ලබා ගැනීමෙන් අනතුරුව මාධ්‍යය ඉදිරියේ අදහස් දක්වමිනි.

පොලිස්පතිවරයා මාධ්‍ය හමුවේ මෙසේ ද කීවේය.

“පොලීසියට කිසිදු දේශපාලන බලපෑමකින් තොරව වැඩ කරගෙන යෑමට හැකි පරිසරයක් මේ වනවිට නිර්මාණය වී තිබෙනවා.    කිසිම අපරාධයක් හංගන්න, නොසලකා හරින්න, විමර්ශනය නොකර ඉන්න පහළ නිලධාරීන්ට මගෙන් කිසිදු අවස්ථාවක  උපදෙස්  ලැබෙන්නේ නැති නිසා නිලධාරීන්ට රාජකාරිය පැහැර හැරීමක් කරන්න බැහැ. අතීතයේ එහෙම දේවල් වූ බව අපි දන්නවා. ඒ නිසා තමයි අපරාධකරුවන් නිදැල්ලේ හිටියේ. මේ දේශපාලන පරිසරයත් එක්ක ශ්‍රී ලංකා පොලීසියට වැඩ කරන්න බැරිනම් මම හිතන්නේ ඒක පොලීසියේ දුර්වලතාවක්. අපි ඒක තේරුම් ගෙන දුර්වල නිලධාරීන්ට එරෙහිව විනය හා නීති ක්‍රියාමාර්ග නොපමවා ගන්නවා. “

“පොලිස්පති ලෙස පත්වීමෙන් පසු මහජනතාව පැමිණිලි ඉදිරිපත් කිරීමට ලබාදුන් වට්ස්ඇප් අංකයට එක් දිනක දී පැමිණිලි 2000 ක් විතර ආවා. මහජනතාව කියා ගන්න බැරි සහ පොලීසිය නිසි ක්‍රියාමාර්ග නොගත්ත පැමිණිලි විශාල සංඛ්‍යාවක් තිබෙන බව මෙයින් පැහැදිලි වෙනවා. පැමිණිලි 2000 ක් සඳහා දිනයකින් දෙකකින් ක්‍රියාමාර්ග ගන්න බැහැ. මේ සඳහා විධිමත් වැඩපිළිවෙළක් දැන් සකස් කරමින් සිටිනවා. ලැබෙන පැමිණිලි සම්බන්ධයෙන් පැමිණිලිකරුට ඉක්මනින් පිළිතුරක් ලබා දෙනවා. මේ ආකාරයෙන් පැමිණිලි නොලැබෙන්න කටයුතු කරන ලෙස ජ්‍යෙෂ්ඨ නියෝජ්‍ය පොලිස්පතිවරුන්ගේ සිට පහළ සියලු නිලධාරීන්ට උපදෙස් ලබා දී තිබෙනවා. “

“පොලීසියේ  උසස් වීම් 2020 සිට නතර වී  තිබුණා. උසස්වීම් ලබාදීම සඳහා අවශ්‍යය පටිපාටිය අපි සම්මත කර ගත්තා. ඒ සම්බන්ධයෙන් අවශ්‍යය මූලික එකඟතාව ජාතික පොලිස් කොමිසමෙන් ලබා ගත්තා. අපි ඉදිරි මාසය ඇතුළත මේකට සාධනීය පිළිතුරක් ලබා දෙනවා. 2020 සිට උසස් වීම් සඳහා සුදුසුකම් ලබන නිලධාරීන්ට ජ්‍යෙෂ්ඨත්වය, කුසලතා හා  තරඟ විභාග ආකාරයෙන් කරන උසස් වීම් ලබා දෙනවා. මුලින්ම ජ්‍යෙෂ්ඨතාව පදනම් කරගෙන කරන උසස් වීම් ලබා දෙන්න අවශ්‍යය කටයුතු මේ වනවිට  සූදානම් කරමින් ඉන්නවා.”

පොලිස්පතිවරයා පැවසුවේ පසුගිය වසර තුනේ දී බඳවා ගැනීම් අත්හිටවූ නිසා පොලිසියේ නිලධාරින් තිස් දහසක හිඟයක් ඇති බවත් එම හිඟය ක්‍රමානුකූලව මගහරවා ගන්නා බවත්ය. මේ වසරේ නිලධාරින් 5000ක් ද ඉදිරි වසරේ තවත් නිලධාරීන් 10000ක් ද බඳවා ගැනීමට නියමිත බව පොලිස්පතිවරයා කීවේය.

-lankasara