කොරෝනා ආසාදිතයන්ගෙන් තුනෙන් එකක් නාවික සෙබළුන්

මෙරටින් හඳුනාගැනුණු කොවිඩ් ආසාදිතයින් ගණන මේ වන විට 630 දක්වා ඉහළගොස් තිබේ. මුළු ආසාදිතයන්ගෙන් තුනෙන් එකක්ම වැලිසර නාවික හමුදා කඳවුරට අනි...

මෙරටින් හඳුනාගැනුණු කොවිඩ් ආසාදිතයින් ගණන මේ වන විට 630 දක්වා ඉහළගොස් තිබේ.

මුළු ආසාදිතයන්ගෙන් තුනෙන් එකක්ම වැලිසර නාවික හමුදා කඳවුරට අනියුක්තව සේවය කළ සෙබළුන් වේ.

මෙරටදී ආසාදනය වූ පළමු කොවිඩ් 19 ආසාදිතයා හඳුනාගත් මාර්තු 11 වැනිදා සිට ගෙවුණු  සති 7 ක කාලය තුළ වැඩිම ආසාදිතයින් ගණනක් වර්තා වුණේ ගෙවුණු සතිය තුළදීයි.

ඒ අනුව ඊයේ දිනයේ හදුනාගත් රෝගින් 31 දෙනා සමග මෙම සතිය තුළ හදුනාගත් කොවිඩ් 19 ආසාදිතයින් සංඛ්‍යාව 309 ක්.

පළමු නාවික හමුදා  ආසාදිත සෙබළා  හඳුනාගැනුණු ඉකුත් අප්‍රේල් 22 වැනිදා සිට ඊයේ දහවල් 12.30 දක්වා කාලය තුළ අලුතින් හදුනාගත් කොවිඩ් 19 ආසාදිතයන් ගණන 308 ක් වන අතර ඊට ඇතුළත් නාවික හමුදා සාමාජිකයින් හා ඔවුන්ගේ ආශ්‍රිතයන් ගණන 235 ක් වේ.

මෙම කාල වකවානුව තුළ ඉන් බැහැරව අනෙකුත් නිරෝධායන කඳවුරු සහ ක්ෂේත්‍ර පරීක්ෂණ වලදී හඳුනාගත් අසාදිතයන් ගණන 73 කි.

එනම් වැලිසර නාවික හමුදා කඳවුරේ සෙබළුන්ට වැළඳීමෙන් පැතිර ගිය නියැදිය හැරුණු කොට ගෙවුණු දින 8 ක කාලය තුළ බාහිර නිරෝධායන කඳවුරු හා ක්ෂේත්‍ර පරීක්ෂණයන්ගෙන් හමු වී ඇත්තේ කොවිඩ් ආසාදිතයන් 73 දෙනකු පමණයි.

පෙරේදා දිනය තුළ හදුනා ගත් අසාදිතයින් 31 ක් දෙනා අතරින් 21 දෙනෙකුම නාවික හමුදා සාමජිකයින් වන අතර තවත් සිව්දෙනෙකු යුද හමුදා සාමාජිකයින් වේ.‍

ඒ අනුව මෙරට ආසාදිතයන් අතුරින් වැඩිම පිරිසක් වර්තා වන්නේ කොළඔ දිස්ත්‍රික්කයෙන් වන අතර මේ වන විට එම දිස්ත්‍රික්කයෙන් වාර්තා වී තිබෙන ආසාදිතයන් ගණන 155 ක්.

කොවිඩ් 19 ව්‍යාප්තිය සම්බන්ධයෙන් අවදානම් කලාප ලෙස නම් කර ඇති සෙසු දිස්ත්‍රික්ක වන කළුතරින් අසාදිතයින් 63 ක්ද , ගම්පහෙන් 47 ක් සහ පුත්තලමෙන් 41 ක් වාර්තා වි තිබිණි.

කුරුණෑගල දිස්ත්‍රික්කයෙන් නව ආසාදිතයින් දෙදෙනකු හදුනාගත් ගැනිමත් සමග එහි මුළු ආසාදිතයින් ගණන 20 දක්වා ඉහළ ගොස් ඇත.