කථානායකවරයා විසින් මහින්ද රාජපක්‍ෂ මහතා විපක්‍ෂනායක ධුරයට පත් කළේ තමා එම ධුරයෙන් ඉවත් කිරීමකින් තොරව නිසා පාර්ලිමේන්තුවේ විපක්‍ෂනායකවරුන් ...
කථානායකවරයා විසින් මහින්ද රාජපක්‍ෂ මහතා විපක්‍ෂනායක ධුරයට පත් කළේ තමා එම ධුරයෙන් ඉවත් කිරීමකින් තොරව නිසා පාර්ලිමේන්තුවේ විපක්‍ෂනායකවරුන් දෙදෙනකු සිටින බව හිටපු විපක්‍ෂනායක ආර්. සම්බන්දන් මහතා ඊයේ (19 දා) පාර්ලිමේන්තුවේදී ප‍්‍රකාශ කළේය.
දැනට පාර්ලිමේන්තු මන්ත්‍රී ධුරයක්‌ නොදරන පුද්ගලයකු විරුද්ධ විපක්‍ෂනායක ධුරයට පත් කිරීමට ගත් හදිසි තීරණය මත කථානායකවරයා ආණ්‌ඩුක්‍රම ව්‍යවස්‌ථාව උල්ලංඝනය කර ඇති බවද ආර්. සම්බන්දන් මහතා විශේෂ ප්‍රකාශයක්‌ කරමින් පාර්ලිමේන්තුවේදී ඊයේ කීවේය.
ආර්. සම්පන්දන් මහතා මෙසේද සඳහන් කර තිබිණි.
2015 සැප්තැම්බර් මස මාව විපක්‍ෂනායක ලෙස කථානායකවරයා විසින් පත් කළා. යළි මාව පිළිගත්තා පාර්ලිමේන්තුවේ දෙවැනි විශාලතම පක්‍ෂයේ නායකයා ලෙස. ඒත් පෙරේදා (18 දා) කථානායකතුමා මහින්ද රාජපක්‍ෂ මහතා විපක්‍ෂනායක ලෙස පත් කළා.
ජනාධිපති මෛත්‍රිපාල සිරිසේන මහතා තමයි, රාජ්‍ය නායකයා, කැබිනට්‌ ප්‍රධානියා සහ එජනිස නායකයා. ඇමැති ධුර කිහිපයකුත් දරනවා. එජනිසෙන් පාර්ලිමේන්තුවට තේරීපත් වූ කිහිප දෙනෙක්‌ ඒ ආණ්‌ඩුවේ කැබිනට්‌ ඇමැතිකම් දැරුවා. නමුත් මේ සන්දර්භය තුළ එජනිස පාර්ලිමේන්තුවේ දෙවැනි විශාලතම පක්‍ෂය නමුත් කථානායකවරයා දෙවරක්‌ මාව විපක්‍ෂනායක ලෙස පිළිගත්තා.
අද වෙද්දි ඇමැති මණ්‌ඩලය පත්කර නෑ. රජය නිසි ලෙස පත්කර නෑ. එජනිස කීප දෙනෙක්‌ ආණ්‌ඩු පක්‍ෂයේ අසුන්ගෙන සිටිනවා. රජය නිසි ලෙස පත්කර නැති විටෙක තවත් අයෙකු විපක්ෂ නායක ලෙස පත්කළ යුතු නෑ. විරුද්ධ පක්‍ෂ නායක ධුරය දරන පුද්ගලයා දැන් ශ්‍රීලනිපයෙන් ඉවත්වී තිබෙනවා. මේ අනුව එතුමාගේ ආසනය අහිමිවී තිබෙනවා.
එනිසා කථානායකවරයා විරුද්ධ පක්‍ෂ නායක ලෙස පිළිගත් පුද්ගලයා පාර්ලිමේන්තු මන්ත්‍රී ධුරයක්‌ දරන කෙනෙක්‌ නොවේ. කථානායකගේ තීරණය හදිසි තීරණයක්‌. ශ්‍රී ලංකාව අසාර්ථක රාජ්‍යයක්‌ බවට පත්වෙනවද? ආණ්‌ඩුක්‍රම ව්‍යවස්‌ථාව උල්ලංඝනය වන තත්වයක්‌ කරා ගමන් කරනවාද? බහුතරවාදය ඉස්‌මතුවී තිබෙනවා. එනිසා නව ආණ්‌ඩුක්‍රම ව්‍යවස්‌ථාවක අවශ්‍යතාව තිබෙනවා. එසේ වුණොත් තමයි දමිළ ජනයාට ගෞරවනීය ලෙස ජීවත් විය හැක්‌කේ.
-අජිත් අලහකෝන්, අකිත පෙරේරා-
COMMENTS