යෝජිත නව ආණ්‌ඩුක්‍රම ව්‍යවස්‌ථාව මගින් 2019 ජනාධිපතිවරණය අහෝසි කිරීමට ආණ්‌ඩුව උත්සාහ ගන්නා බව ශ්‍රී ලංකා පොදුජන පෙරමුණේ සභාපති මහාචාර්ය ...
යෝජිත නව ආණ්‌ඩුක්‍රම ව්‍යවස්‌ථාව මගින් 2019 ජනාධිපතිවරණය අහෝසි කිරීමට ආණ්‌ඩුව උත්සාහ ගන්නා බව ශ්‍රී ලංකා පොදුජන පෙරමුණේ සභාපති මහාචාර්ය ජී. එල්. පීරිස්‌ මහතා පැවසීය.
එසේම රජය ගෙන ඒමට සැරසෙන නව ව්‍යවස්‌ථාව මගින් මෙරට පාර්ලිමේන්තුවට මන්ත්‍රීවරුන් 55 දෙනකුගෙන් සමන්විත සෙනෙට්‌ සභාවක්‌ පත් කිරීමට යෝජනා වී ඇතැයි ද හෙතෙම පැවසීය.
මේ අන්දමට සෙනෙට්‌ සභාවක්‌ හෙවත් මෙවැනි මන්ත්‍රී මණ්‌ඩලයක්‌ පත් කිරීමට යෝජනා වුවද ඔවුන්ගේ කාර්යභාරය හා බලතල මොනවාද යන්න එහි සඳහන් නොවීම විශේෂත්වයක්‌ බවද හෙතෙම සඳහන් කළේය.
මෙම සෙනෙට්‌ මන්ත්‍රී මණ්‌ඩලය නියෝජනය කරන මන්ත්‍රීවරුන් 55 දෙනා අතරින් 45 දෙනකුම තෝරා පත්කරනුයේ පළාත් සභා මගින් බවද පීරිස්‌ මහතා පෙන්වා දුන්නේය.
පාර්ලිමේන්තුව තුළ තමන්ට අවශ්‍ය අන්දමට කටයුතු නොකරන්නේ නම් එසේ පත්කරන සෙනෙට්‌ මන්ත්‍රීවරු 45 දෙනා අතරින් ඕනෑම අයකු වහාම ඉවත් කිරීමට පළාත් සභාවලට බලතල ලැබී ඇතැයි ද හෙතෙම පැවසීය.
පාලන ව්‍යුහය මුළුමනින්ම කනපිට හැරවීමට :
මේ දක්‌වා රහසිගතව තිබෙන රජයේ නව ආණ්‌ඩුක්‍රම ව්‍යවස්‌ථා කෙටුම්පතේ පිටපතක්‌ ද රැගෙන ඊයේ කොළඹ නෙළුම් මාවතේ පැවැති පොදුජන පෙරමුණේ මාධ්‍ය හමුවකට එක්‌වෙමින් ඒ මහතා එම කරුණු අනාවරණය කළේය.
නව ව්‍යවස්‌ථාව මගින් ජනතාව පුල පුලා බලා සිටින 2019 ජනාධිපතිවරණය අහෝසි කිරීමට සැලසුම් කර තිබෙන බව පැවසූ ජී. එල්. පීරිස්‌ මහතා පළාත් සභා වෙත සෘජුවම ඕනෑම පනතක්‌ සම්මත කර ගැනීමට බලතල ලබාදෙමින් රටේ පාලන ව්‍යුහය මුළුමනින්ම කනපිට හැරවීමට සැරසෙන බවද අවධාරණය කළේය.
එසේම පළාත් සභා සම්බන්ධයෙන් මෙතෙක්‌ ජනාධිපතිවරයාට හා ආණ්‌ඩුකාරවරුන්ට තිබූ සියලුම බලතල අහෝසි කරමින් එක පෑන් පහරකින් සියල්ල උඩු යටිකුරු කිරීමට නව ආණ්‌ඩුක්‍රම ව්‍යවස්‌ථාව හරහා යෝජනා වී තිබෙන බවද ජී. එල්. පීරිස්‌ මහතා වැඩිදුරටත් පැවසීය.
COMMENTS