ඉකුත් ජනාධිපතිවරණය සමයේ ජාතීන් අතර සුහදතාව කඩාකප්පල් වන ආකාරයේ ව්‍යාජ ලියැවිල්ලක් මාධ්‍ය හමුවකදී ප්‍රසිද්ධියට පත් කළේ යැයි චෝදනා එල්ල වී ස...
ඉකුත් ජනාධිපතිවරණය සමයේ ජාතීන් අතර සුහදතාව කඩාකප්පල් වන ආකාරයේ ව්‍යාජ ලියැවිල්ලක් මාධ්‍ය හමුවකදී ප්‍රසිද්ධියට පත් කළේ යැයි චෝදනා එල්ල වී සිටින එක්සත් ජාතික පක්ෂයේ හිටපු මහලේකම් තිස්ස අත්තනායක මහතාට විදේශගත වීම සඳහා පනවා තිබූ තහනම තාවකාලිකව ලිහිල් කිරීමට කොළඹ මහාධිකරණය අද (05) නියෝග කළේය.
තිස්ස අත්තනායක මහතා සිය නීතිඥවරුන් මාර්ගයෙන් කළ ඉල්ලීමක් සලකා බැලීමෙන් පසුව කොළඹ මහාධිකරණ විනිසුරු විකුම් කළුආරච්චි මහතා මෙම නියෝගය කළේය.
විත්තිකාර තිස්ස අත්තනායක මහතා සිය නීතිඥවරුන් මාර්ගයෙන් අධිකරණයට දන්වා සිටියේ කැලණිය විශ්වවිද්‍යාලයේ ආදි ශිෂ්‍යයන්ගේ හමුවක් ඕස්ට්‍රේලියාවේ මෙල්බර්න් නුවර පැවැත්වීමට නියමිතව ඇති බවයි.
එම හමුවට සහභාගි වීම සඳහා අධිකරණය මඟින් තමන්ට පනවා තිබෙන විදෙස් ගමන් තහනම මෙම මස 10 වනදා සිට ලබන 25දා දක්වා ඉවත් කිරීමේ නියෝගයක් නිකුත් කරන මෙන් තිස්ස අත්තනායක මහතා අධිකරණයෙන් ඉල්ලා සිටියේය.
එම ඉල්ලීමට රජයේ පාර්ශවය විරෝධය පළ කළේ නැත.
ඒ අනුව අදාළ කාලසීමාව තුළ විත්තිකරුට පනවා තිබු විදෙස් ගමන් තහනම ඉවත් කිරීමට නියම කළ මහාධිකරණ විනිසුරු විකුම් කළුආරච්චි මහතා අධිකරණය භාරයේ පවතින ඔහුගේ විදේශ ගමන් බලපත්‍රය මුදා හරින මෙන් නියම කළේය.
විදේශගතව යළි ශ්‍රී ලංකාවට පැමිණීමෙන් පසුව එම විදේශ ගමන් බලපත්‍රය මැයි මස 07 වනදා ට පෙර අධිකරණයට භාරදිය යුතු බවද විනිසුරුවරයා විත්තිකරු වන තිස්ස අත්තනායක මහතාට නියෝග කළේය.
ඉකුත් ජනාධිපතිවරණ සමයේ කොළඹ පැවති මාධ්‍ය හමුවක දී එක්සත් ජාතික පක්ෂය සහ දෙමළ ජාතික සන්ධානය අතර රහසිගත ගිවිසුම පවතින බවට ලේඛනයක් ප්‍රදර්ශනය කරමින් ජාතීන් අතර සුහදතාව කඩාකප්පල් කිරීමට තැත් කළේ යැයි චෝදනා කරමින් තිස්ස අත්තනායක මහතාට එරෙහිව නීතිපතිවරයා විසින් එක්සත් ජාතීන්ගේ සිවිල් හා දේශපාලන අයිතිවාසිකම් පිළිබඳව සම්මුති පනත යටතේ මෙම නඩුව පවරා තිබේ.
COMMENTS