වැලිකඩ බන්ධනාගාරය තුළදී රැඳවියන් ඝාතනය කිරීමේ සිද්ධිය සම්බන්ධයෙන් අපරාධ පරීක්ෂණ දෙපාර්තමේන්තුව මඟින් අත්අඩංගුවට ගෙන සිටින හිටපු බන්ධනාගාර...
වැලිකඩ බන්ධනාගාරය තුළදී රැඳවියන් ඝාතනය කිරීමේ සිද්ධිය සම්බන්ධයෙන් අපරාධ පරීක්ෂණ දෙපාර්තමේන්තුව මඟින් අත්අඩංගුවට ගෙන සිටින හිටපු බන්ධනාගාර කොමසාරිස් එමිල් රන්ජන් ළමාහේවා සහ පොලිස් පරීක්ෂක රංගජීව යන දෙදෙනා ලබන 24 වනදා දක්වා තවදුරටත් රක්ෂිත බන්ධනාගාර කොළඹ අතිරේක මහේස්ත්‍රාත් රංග දිසානායක මහතා අද (10) නියෝග කළේය.
එම නඩුව අද කැඳවූ අවස්ථාවේදී විත්තියේ නීතිඥවරුන් අධිකරණයෙන් ඉල්ලා සිටියේ අදාළ සැකකරුවන් දෙදෙනා අධිකරණ මනෝ වෛද්‍ය විශේෂඥකු වෙත ඉදිරිපත් කර වාර්තාවක් කැඳවන ලෙසයි. ඒ අනුව අතිරේක මහේස්ත්‍රාත්වරයා බන්ධනාගරා අධිකාරිවරයාට නියෝග කළේ සැකකරුවන් දෙදෙනා අධිකරණ මනෝ වෛද්‍ය විශේෂඥයෙකු වෙත ඉදිරිපත් කර වාර්තාවක් කැඳවීමට කටයුතු කරන ලෙසයි.
කෙසේ වෙතත් අද දිනයේදී අධිකරණය භූමිය ඉදිරිපිට රැස්ව සිටි සිවිල් ඇඳුමින් සැරසුණු 20ක පමණ පිරිසක් සැකකරුවන් අධිකරණයට පැමිණි අවස්ථාව ආවරණ කිරීමට එහි ගිය මාධ්‍යවේදීන්ට බාධා එල්ල කළේය.
අද නඩු අවස්ථාවේදී රහස් පොලීසිය අධිකරණයට දන්වා සිටියේ සාක්ෂිකරුවන් අනාවරණය කර ඇති තොරතුරු මත ඉදිරි පරීක්ෂණ සිදු කරන බවයි. එසේම සැකකරුවන් අත්අඩංගුවට ගැනීම සඳහා ප්‍රමාණවත් සාක්ෂි තිබූ බැවින් ඔවුන් අධිකරණයට ඉදිරිපත් කළ බවද රහස් පොලීසිය අධිකරණයට දන්වා සිටියේය.
මෙහිදී එමිල් රන්ජන් වෙනුවෙන් පෙනී සිටි ජනාධිපති නීතිඥ ශවීන්ද්‍ර ප්‍රනාන්දු කියා සිටියේ සැකකරුවන් අත්අඩංගුවට ගැනීම සඳහා රහස් පොලීසිය නීතිපතිවරයාගෙන් උපදෙස් ලබාගෙන නොමැති බවයි.
අගතියට පත් පාර්ශවය වෙනුවෙන් පෙනී සිටි නීතිඥවරුන් අධිකරණයට කරුණු දක්වමින් කියා සිටියේ අදාළ නඩුවේ සාක්ෂිකරුවකු වන බන්දුල ලියනාරච්චි නමැත්තාගේ බිරිඳට ආයුධ සන්නද්ධ පිරිසක් තර්ජනය කර ඇති බවයි. ඒ පිළිබඳව ඇය කිරිබත්ගොඩ පොලීසියට පැමිණිල්ලක් ඉදිරිපත් කර ඇති බවත් සාක්ෂිකරුවන් ආරක්ෂා කිරීම සඳහා විශේෂ නියෝගයක් ඉදිරිපත් කරන ලෙසද අධිකරණයෙන් ඉල්ලා සිටියේය.
ඒ අනුව අදාළ තර්ජනය කිරීමේ සිද්ධිය සම්බන්ධයෙන් පරීක්ෂණයක් පවත්වා කරුණු වාර්තා කරන ලෙස රහස් පොලීසියට නියම කළේය.
COMMENTS