දිවයින ආසන්නයේ පැවති තරංගාකාර කැළඹිලි ස්වභාවය මේ වන විට අඩු පීඩන තත්ත්වයක් බවට පත්ව ඇති අතර එය තවදුරටත් වර්ධනය වනු ඇති බව කාලගුණ විද්‍යා ද...
දිවයින ආසන්නයේ පැවති තරංගාකාර කැළඹිලි ස්වභාවය මේ වන විට අඩු පීඩන තත්ත්වයක් බවට පත්ව ඇති අතර එය තවදුරටත් වර්ධනය වනු ඇති බව කාලගුණ විද්‍යා දෙපාර්තමේන්තුව පවසයි.
එම තත්ත්වය යටතේ දිවයින අවට මුහුදු ප්‍රදේශ කිහිපයක් රළු ස්වභාවයක් ගනු ඇතැයි අපේක්ෂා කරන අතර ඒ හේතුවෙන් ධීවර ප්‍රජාවට අනතුරු ඇඟවීම්ද නිකුත් කර තිබේ.
කාලගුණ විද්‍යා දෙපාර්තමේන්තුව නිකුත් කළ නිවේදනයේ දැක්වෙන්නේ එම අඩු පීඩන තත්ත්වය මේ වන විට දිවයිනට දකුණු දෙසින් ස්ථානගතව ඇති අතර බස්නාහිර දෙසට ගමන් කරනු ඇති බවයි.
මේ හේතුවෙන් දිවයිනේ බොහෝ ප්‍රදේශවල අහස වළාකුළුවලින් බරව පවතින අතර වැසි හෝ ගිගුරුම් සහිත වැසි ඇති විය හැකියි.
එමෙන්ම මේ තත්ත්වය යටතේ යාපනය සිට මන්නාරම ,කොළඹ ගාල්ල සහ හම්බන්තොට හරහා පොතුවිල් දක්වා ගැඹුරු හා නොගැඹුරු මුහුදු ප්‍රදේශවල තද වැසි සහ තද සුළං ඇති විය හැකි බව ද කාලගුණ විද්‍යා දෙපාර්තමේන්තුව පෙන්වා දෙයි.
ඒ හේතුවෙන් ඉදිරි පැය 48 තුළ එම මුහුදු ප්‍රදේශවල ධීවර කටයුතුවල නිරත නොවන්නැයි එම දෙපාර්තුමේන්තුව ධීවර ප්‍රජාවගෙන් ඉල්ලා සිටින අතර නාවිකයින්ට ද මේ පිළිබඳව අවධානයෙන් පසුවන්නැයි දැනුම් දෙයි.
මේ අතර මධ්‍යම කඳුකරයේ ජල පෝෂක ප්‍රදේශවලට ඊයේ (11) රාත්‍රියේ සිට කඩින් කඩ තද වැසි ලැබෙමින් පවතියි.
මෙලෙස කාසල්රි සහ මාවුස්සාකැලේ ජල පෝෂක ප්‍රදේශවලට වර්ෂාව පතිත වුවද පහළ බැස ඇති එම ජලාශවල ජල මට්ටම ඉහළ යාමට තරම් එය ප්‍රමාණවත් නොවන බවයි ජලාශ භාර ඉංජිනේරුවන් පවසයි.
COMMENTS