පසුගිය ජනාධිපතිවරණ සමයේ ජනාධිපති මෛත්‍රීපාල සිරිසේන මහතා සහ අගමැති රනිල් වික්‍රමසිංහ මහතා අතර එකඟතාවයක් ඇති බවට ප්‍රකාශයට පත් කරමින් ජනාධි...
පසුගිය ජනාධිපතිවරණ සමයේ ජනාධිපති මෛත්‍රීපාල සිරිසේන මහතා සහ අගමැති රනිල් වික්‍රමසිංහ මහතා අතර එකඟතාවයක් ඇති බවට ප්‍රකාශයට පත් කරමින් ජනාධිපතිවරණයට බලපෑ හැකි ආකාරයේ ප්‍රකාශ නිකුත් කළ බවට එක්සත් ජාතික පක්ෂයේ හිටපු මහ ලේකම් තිස්ස අත්තනායක මහතාට එරෙහි නඩුවේ සාක්ෂි දීමට අධිකරණයේ පෙනීසිටින ලෙස දැනුම් දෙමින් කොළඹ මහාධිකරණ විනිසුරු විකුම් කලුආරච්චි මහතා ජනාධිපතිවරයාට සහ අගමැතිවරයාට යළිත් වරක් අද(26) සිතාසි නිකුත් කළේය.
ලබන ජූලි මස 24 වැනිදා අධිකරණය හමුවේ පෙනී සිටින ලෙස දැනුම් දෙමින් මෙලෙස සිතාසි නිකුත් කළේ මීට පෙර නිකුත් කළ සිතාසි වලට අනුව ජනාධිපති හෝ අගමැති අධිකරණයේ පෙනී නොසිටීම හේතුවෙනි.
අද නඩුව කැඳවූ අවස්ථාවේදී නීතිපතිවරයා විසින් පෙනී සිටි ජ්‍යෙෂ්ඨ රජයේ නීතිඥ ලක්මිනි ගිරිහාගම මෙනවිය අධිකරණයට දන්වා සිටියේ සාක්ෂිකරුවන් වන ජනාධිපති මෛත්‍රීපාල සිරිසේන මහතා සහ අග්‍රාමාත්‍ය රනිල් වික්‍රමසිංහ මහතා රාජකාරිමය හේතුන් මත අද දින අධිකරණය වෙත පැමිණිමට අපහසු බවත් ඔවුන්ට වෙනත් දිනයක් ලබා දෙන ලෙසත්ය.
එහිදී සාක්ෂිකරුවන් දිගින් දිගටම අධිකරණයට ඉදිරිපත් නොවීම නිසා විත්තිකරුට අගතියක් සිදුවන බව පෙන්වා දුන් විනිසුරුවරයා ඔහුට දිගටම විත්තිකරුවෙකු විය නොහැකි බව ද කියා සිටියේය.
එම නිසා මෙම නඩුව ජුනි මස 24 වන දින නඩුව කැඳවීමට නියෝග කළ විනිසුරුවරයා එදිනට යළි අධිකරණය වෙත පෙනී සිටින්නැයි සිතාසි නිකුත් කර සිටියේය.
COMMENTS