තෙල් මිල දී ගැනීම සඳහා වන රජයේ ක්‍රියාවලිය යළිත් වරක් මතභේදයට ලක් කරමින්, තෙවරක් අසාදු ලේඛණගත කරනු ලැබූ සිංගප්පූරුවේ විටෝල් සමාගම නැවත වර...
තෙල් මිල දී ගැනීම සඳහා වන රජයේ ක්‍රියාවලිය යළිත් වරක් මතභේදයට ලක් කරමින්, තෙවරක් අසාදු ලේඛණගත කරනු ලැබූ සිංගප්පූරුවේ විටෝල් සමාගම නැවත වරක් තෙල් සැපයුම්කරුවෙකු ලෙස ස්ථාපිත කිරීමට ලංකා ඛණිජතෙල් නීතිගත සංස්ථාවේ අධ්‍යක්ෂ මණ්ඩලය සැරසෙන බව වාර්තා වේ.
සාමාන්‍ය ක්‍රියාවලිය වන, අසාදු ලේඛණගත කළ සැපයුම්කරුවෙකුට දඩයක් පැනවීමෙන් පසුව එම සැපයුම්කරුවා සමඟ නැවත ගනුදෙනු කිරීම සඳහා තීරණ ගැනීමට අධ්‍යක්ෂවරුන්ට බලය තිබෙන බව සංස්ථාවේ නිලධාරියෙකු කියා සිටී.
වසර 2009 අගෝස්තු මස විටෝල් සමාගම සැපයූ තත්ත්වයෙන් බාල තෙල් මෙට්‍රික් ටොන් 20,000ක් භාවිතා කළ බලාගාරවල යන්ත්‍රසූත්‍ර බිඳ වැටී ඒවා වසා දැමීමෙන් ජාතික ව්‍යසනයක තත්ත්වයක් උදා විය.
ඉන් රටට සිදු වූ පාඩුව ඩොලර් මිලියන 10කි.
එවකට විෂය භාර ඇමතිවරයා සති තුනක කාලයක් තිස්සේ එම සමාගම ආරක්ෂා කිරීමට උත්සාහ දැරුවද, පසුව එය අසාදු ලේඛණගත කරනු ලැබීය.
ඇමතිවරයා හා විටෝල් අතර ඇති වූ පෞද්ගලික එකඟතාවකට අනුව, 2011 දෙසැම්බර් සිට තෙල් සැපයුම්කරුවෙකු ලෙස එම සමාගම නැවත වරක් ස්ථාපිත කරනු ලැබූයේ ඩොලර් 150,000ක දඩයක් පැනවීමෙන් පසුවයි.
එම වසරේ අගෝස්තු මාසයේදී විටෝල් විසින් අපවිත්‍ර ඩීසල් මෙට්‍රික් ටොන් 20,000ක් සැපයූ අතර, ඒවා භාවිතා කළ මෝටර් රථ, ලොරි රථ, දුම්රිය සහ බස් රථ 1,000කට අධික සංඛ්‍යාවක් ධාවනය කිරීමට නොහැකි තත්ත්වයක් ඇති විය.
ජනතාවගෙන් එල්ල වූ විරෝධය හා මාධ්‍යයේ බලපෑම හේතුවෙන් ඇමතිවරයා කියා සිටියේ, මෙවර විටෝල් ස්ථීරවම අසාදු ලේඛණගත කළ බවයි.
නව ඇමතිවරයෙකු පත් වන තෙක් නිශ්ශබ්දව සිටි සැපයුම්කරුවා, ඔහු ලවා තමන්ගේ නම ශුද්ධ කරවාගෙන නැවතත් සැපයුම්කරුවන්ගේ ලේඛණයට ඇතුලත් කර ගත්තේය.
ජනතාව සතුටු කිරීමට ලංකා ඛණිජතෙල් නීතිගත සංස්ථාව කළේ, සිදු වූ හානිය වෙනුවෙන් විටෝල් දඩයක් ගෙවූ බවට ප්‍රසිද්ධ කිරීමයි.
නමුත් තෙවැනි වරටත් සිදු වූයේ, 2014 දී කෙරවලපිටිය විදුලි බලාගාරයේ භාවිතය සඳහා එම සමාගම සැපයූ සල්ෆර් අඩු ඉන්ධන තෙල්වල ජලය හා භාවිතයෙන් ඉවත් කළ ලිහිස්සි තෙල් අඩංගු වීම නිසා එම විදුලි බලාගාරයේ විදුලි ජනනය අත්හිටුවීමට සිදු වීමයි.
සැපයුම්කරුගේ නියෝජිතයා එවකට ඇමතිවරයා හා හිටපු ලංකා ඛණිජතෙල් නීතිගත සංස්ථා සභාපතිවරයා හමු වී තවදුරටත් ගනුදෙනු කිරීම පිළිබඳව සාකච්ඡා කළ බව වාර්තා වේ.
එකඟතාවට පැමිණීමෙන් පසුව ඇමතිවරයා උපදෙස් ලබා දුන්නේ සැපයුම්කරුවෙකු ලෙසින් නැවතත් වරක් විටෝල් ස්ථාපිත කරන ලෙසටයි.
COMMENTS