රජරට වකුගඩු රෝගී තත්ත්වය හම්බන්තොටටත්

හම්බන්තොට දිස්ත්‍රික් සෞඛ්‍ය සේවා අධ්‍යක්ෂ කාර්යාලය මගින් ක්‍රියාත්මක කෙරෙන ' කෙතට සුවය' සෞඛ්‍ය සායන මගින් මේ වනවිට හේතුව නිශ්...

හම්බන්තොට දිස්ත්‍රික් සෞඛ්‍ය සේවා අධ්‍යක්ෂ කාර්යාලය මගින් ක්‍රියාත්මක කෙරෙන 'කෙතට සුවය' සෞඛ්‍ය සායන මගින් මේ වනවිට හේතුව නිශ්චිත වශයෙන් හඳුනානොගත් (සී.කේ.ඩී.යූ) වකුගඩු රෝගින් 09දෙනෙක් හා හේතුව හඳුනාගත් (සී.කේ.ඩී) රෝගින්56 දෙනෙක් හමු වී ඇති බව තංගල්ල මූලික රෝහලේ අධ්‍යක්ෂ වෛද්‍ය චමල් සංජීව මහතා ප්‍රකාශ කරයි.

මෙම විශේෂ ගොවි සායන මගින් වරකට ගොවි පවුල් 500ත් 1000ත් අතර ප්‍රමාණයක් දෛනිකව පරික්ෂාවට ලක් කෙරෙන අතර එහිදී හදුනාගත් හා හදුනා නොගත් වකුගඩු රෝගී තත්ත්වයන් දියවැඩියා රෝගී තත්ත්වයන්, අධික කොලෙස්ටරෝල් තත්ත්වයන්, මුඛ පිළිකා ඇතුළු දන්තා ආබාධයන් රැසක් සදහා වෛද්‍ය පරීක්ෂණ කණ්ඩායම් වල අවධානය යොමු කෙරේ.

රජරට ප්‍රදේශයේ පැතිරයමින් පවතින හඳුනානොගත් වකුගඩු රෝගින් හම්බන්තොට ප්‍රදේශයෙන් ද මෙලෙස වාර්තාවීම නිසා වකුගඩු රෝගින් හඳුනා ගැනිමේ වෛද්‍ය සායන හම්බන්තොට දිස්ත්‍රික්කයේ සෑම සෞඛ්‍ය වෛද්‍ය නිළධාරි කොට්ඨාසයකම දිස්ත්‍රික් සෞඛ්‍ය සේවා අධ්‍යක්ෂ කාර්යාලයේ මෙහෙයවීමෙන් සිදු කිරීම ආරම්භ වුයේ පසුගිය ජුනි මස 30 වැනිදා අගුනුකොලපැලැස්ස ප්‍රදේශයෙනි.

මෙම රෝගින් හඳුනාගැනිම සඳහා තිස්සමහාරාමය, ලුණුගම්වෙහෙර, හම්බන්තොට, සූරියවැව, අම්බලන්තොට, අඟුණකොලපැලැස්ස, බෙලිඅත්ත, තංගල්ල, ඕකේවෙල, වලස්මුල්ල යන කොට්ඨාසවල පැවැති සායන වලින් පුද්ගලයින් 18244 දෙනෙක් පරීක්ෂාවට ලක්කර තිබේ.

මේ සම්බන්ධව අදහස් දැක්වූ වෛද්‍ය චමල් සංජීව මහතා ප්‍රකාශ කළේ මේ වනවිට හඳුනානොගත් වකුගඩු රෝගින් සියළුදෙනා හම්බන්තොට මහ රෝහලට සායන සඳහා යොමුකර ප්‍රතිකාර ලබාදීම සිදුකරන බවයි.

දැනට වාර්තා වී ඇති හදුනාගත් රෝගින් 09දෙනාම ගොවියන් වන අතර ඔවුන් සියල්ල පිරිමි අය වීමද විශේෂයක් වී තිබේ.

තිස්සමහාරාමය, තණමල්විල හා තිස්සපුර යන ප්‍රදේශවලින් රෝගින් 02ක්ද සූරියවැව, මහවැලිකඩආර, අලිඔළුආර, සුරවිරුගම යන ප්‍රදේශවලින් රෝගින් 04දෙනෙක් ද අම්බලන්තොට, පොලියර්වත්ත හා ලුණම, පල්ලේරොට යන ප්‍රදේශවලින් රෝගීන් 03ක්ද වශයෙන් රෝගින් වාර්තා වී තිබේ.

මේ සඳහා පැවැත්වෙන සායන සඳහා පුරුෂ පාර්ශවයේ පැමිණීමේ අඩුවක් පවතින හෙයින් ඉදිරියේ දි තම කොට්ඨාසයේ පවත්වන වකුගඩු රෝගින් පරීක්ෂා කිරීමේ සායන සඳහා පුරුෂ පාර්ශවයට ද පැමිණෙන මෙන් වෛද්‍ය චමල් සංජිව මහතා සියලු ගොවි මහතුන්ගෙන් ඉල්ලා සිටී.

ඡායාරූප පහතින්.