දෙමළ ජනාතාවගේ නිදහස වෙනුවෙන් එල්.ටී.ටී.ඊ සංවිධානය නැවත ඇති කළ යුතු බවට ළමා කටයුතු රාජ්‍ය ඇමතිනි විජේකලා මහේෂ්වරන් මහත්මිය විසින් කළ ප්‍රකා...
දෙමළ ජනාතාවගේ නිදහස වෙනුවෙන් එල්.ටී.ටී.ඊ සංවිධානය නැවත ඇති කළ යුතු බවට ළමා කටයුතු රාජ්‍ය ඇමතිනි විජේකලා මහේෂ්වරන් මහත්මිය විසින් කළ ප්‍රකාශය හෙළා දකින බවත් එම ප්‍රකාශය හිටපු ජනාධිපති මහින්ද රාජපක්ෂ මහතාගේ කුමන්ත්‍රණයක්ද යන්න පිළිබඳව සැකයක් ඇති බවත් එක්සත් ජාතික පක්ෂ පාර්ලිමේන්තු මන්ත්‍රී කාවින්ද ජයවර්ධන මහතා පවසයි.
අද(03) උදෑසන ගම්පහ ප්‍රදේශයේ දී මාධ්‍යවේදීන් විසින් අසන ලද පැනයකට පිළිතුරු දෙමින් මන්ත්‍රීවරයා මෙම අදහස් පළ කළේය.
අද වන විට රට තුළ යහපාලනය ස්ථාපිත කර ඇති බවත්, ද්‍රවිඩ ජනතාවට වත්මන් රජය විසින් දැවැන්ත කාර්යභාරයක් ඉටු කර තිබියදීත් දෙමළ ජනතාව වෙනුවෙන් එල්.ටී.ටී.ඊ සංවිධානය නැවත වරක් ඉල්ලා සිටීම කිසිසේත් අනුමත කළ නොහැකි බවත් මන්ත්‍රීවරයා මෙහිදී සඳහන් කළේය.
දෙමළ ජනතාවට වත්මන් රජය කළ මෙහෙවර ඇමතිනිය නිසි ලෙස දන්නේ නම් මෙවැනි කථාවක් කිසිවිටෙකත් නොකරන බව ද මන්ත්‍රීවරයා පවසයි.
කෙසේ වෙතත් දේශපාලන වාසි ගැනීම සඳහා මෙවැනි කථාවක් සිදු කරන්නට ඇතැයි සැක කළ හැකි බවත් එසේත් නොමැති නම් නිව්යෝක් ටයිම්ස් වාර්තාව සම්බන්ධයෙන් ඇතිවී තිබෙන මතභේදාත්මක තත්ත්වය මඟ හැරවීම සඳහා මහින්ද රාජපක්ෂ මහතා විසින්ම සිදු කරන ලද්දක් දැයි සැකයක් මතුවන බව ද මන්ත්‍රීවරයා මෙහිදී වැඩිදුරටත් කියා සිටියේය.
අද වන විට උතුරේ එල්.ටී.ටී.ඊ සංවිධානයට යටත්ව සිටි ජනතාව පුනුරුත්තාපනය කර සාමාන්‍ය ජනතාව ලෙස ජීවත් වීමේ අයිතිය රජය තහවුරු කර ඇති බවත්, කෙසේ හෝ වත්මන් රජය යටතේ කිසිවිටෙකත් නැවතත් ත්‍රස්තවාදයට හිස එසවීමට ඉඩක් නොමැති බවත් මන්ත්‍රීවරයා මෙහිදී වැඩිදුරටත් සඳහන් කළේය.
විජේකලා මහේෂ්වරන් මන්ත්‍රීවරිය දකුණේ සිටින ජාතිවාදී හා ආගම්වාදී අන්තවාදී පිරිස්වල පංගුකාරයෙක් වී ඇත්දැයි සැකයක් මතුවන බව ද ඔහු තවදුරටත් පැවසීය.
ජනාධිපතිවරයා හා ආරක්ෂක අංශ එක්ව මේ සම්බන්ධයෙන් ඉදිරියේ දී තීරණයක් ගනු ඇති බවත්, තනතුරු ගැන නොසිතා නීතිය ක්රියාත්මක විය යුතු බවත් එහිදී කාවින්ද ජයවර්ධන මහතා වැඩිදුරටත් සඳහන් කළේය.
COMMENTS